Bankterdiń biri LRT qurylysyn jalǵastyrý úshin kelisimin berdi. Bul týraly elorda máslihatynyń kezekten tys sessiiasynda qala ákimi Altai Kólginov aitty, dep habarlaidy QazAqparat.
Sessiia jumysynda LRT qurylysy máselesi kóterildi. Osy oraida aiaqtalmaǵan qurylys nysandary qala men áýejaiǵa baratyn joldyń kórkin buzyp turǵany aityldy.
«LRT máselesi birazdan beri talqylanyp keledi. Onyń problemasy qaidan paida boldy? Birinshiden, ekinshi deńgeili bank bankrotqa ushyraǵan kezde sol jerde qarajat buǵattalyp qaldy. Ekinshiden, osy máselede zań buzýshylyq boldy. Úshinshiden, qazir eń negizgi másele – ol qarjylandyrý. Bul jobaǵa qomaqty qarajat kerek. Osyǵan deiin birshama jumystar atqarylǵanyn bilesizder, ornatylǵan injenerlik qurylystar qalanyń sánin keltirmei turǵany ras. Biraq bastalǵan jumys aiaqtalýy kerek», - dedi A. Kólginov.
Onyń aitýynsha, bir jyldan astam ýaqyt boiy ákimdik banktermen tiisti talqylaýlar júrgizdi.
«Bul jobany iske asyrýǵa bankter qosylýǵa qaýqarsyz bolyp tur. Sondyqtan ministrlikpen birge konkýrs jariialadyq. Qazirgi kezde tiisti bank óziniń kelisimin berip jatyr, ony aldaǵy ýaqytta qosymsha habarlaimyz. Iaǵni olar kelisimshartqa qol qoiǵanan keiin aitamyz. Jospar – jobany aiaqtaý. Qazir áýejai jaqta bir shaqyrymnan astam balkalar ornatyldy», - dedi qala ákimi.
