Búgin Úkimet otyrysynda Nur-Sultan qalasynyń ákimi Altai Kólginov elordadaǵy koronavirýsqa qatysty ahýal týraly esep berdi, dep habarlaidy QazAqparat.
«16 qańtardan bastap qala «qyzyl» aimaqqa kirdi. Reprodýktivtilik indeksi qazir 1.279-dy qurap otyr. Osyǵan orai kelesi sharalar qabyldandy. Brinshiden, infektsiialyq statsionarlarda 720 oryn ázirlendi. Ondaǵy júkteme 47 paiyzdy nemese 335 tósek-oryndy quraidy. 121 reanimatsiialyq tósek-oryn daiyndalǵan. Onda 27 naýqas em alýda. 500 karantindik oryn ashyldy. Onda PTR anyqtamasy joq halyqaralyq áýe reisteriniń jolaýshylary ornalastyrylady. 6 qazannan bastap 8 800-den astam jolaýshy karantindik statsionarǵa ornalastyryldy. Barlyǵy 62 oń nátije anyqtaldy», - dedi ol.
Ekinshiden, qala basshysynyń aitýynsha, zerthanalar sany 23-ke deiin kóteitildi. Olardyń jalpy qýattylyǵy táýligine 12 myńnan astam zertteý júrgizýge múmkindik beredi. Buǵan qosa, kópbeiindi aýrýhanalardyń qabyldaý bólimderine, statsionarlardyń akýsherlik bloktarynda nátijesi 1,5-2 saǵattyń ishinde daiyn bolatyn izotermiialyq shaǵyn zerhanalar ashyldy. Testileý sany edáýir kóbeitildi. 99 myńǵa deiin artty. Qyrkúiekte 56 myń bolǵan. Tiisinshe indettiń anyqtalýy shamamen 9 esege kóbeidi. Aqparattardy keshendi jetkizýdiń nátijesinde turǵyndar óz erikterimen jii testileýge júginetin boldy.
«Úshinshiden, ambýlatoriialyq-zerthanalyq qyzmet jumysy kúsheitildi. Úige baryp, shaqyrtýlarǵa qyzmet kórsetý úshin 5 myń halyqqa 1 brigada esebimen mobildi brigadalardyń jumysy uiymdastyryldy. Qala boiynsha 207 mobildik brigada jumys isteýde. Patsientterdiń aǵymyn tiimdi bólý úshin ahýaldyq ortalyq jumys istep jatyr», - dedi elorda ákimi.
Tórtinshi, Altai Kólginov quqyq qorǵaý organdarymen shekteý sharalaryn saqtaý boiynsha monitoring jalǵasyp jatqanyn aitty. 9 mobildi top jumys isteýde. Osy ýaqytqa deiin 9 myńnan astam nysan monitoringpen qamtyldy. Karantin rejimin júieli túrde buzýshylarmen jumys kúsheitildi. Ákimshilik jaýapkerilikke 1,5 myńǵa jýyq jeke jáne zańdy tulǵalar tartylyp, jalpy somasy 300 mln teńge aiyppul salyndy.
«Besinshi, statsionarlar meditsinalyq quraldarmen jáne qajetti dári-dármekpen tolyqtai qamtylǵan. Qaladaǵy epidemiologiialq jaǵdaidy eskere otyryp, birqatar shekteý men karantindik sharalar qabyldandy. Olar dúisenbiden bastap kúshine endi», - dedi Nur-Sultan qalasynyń basshysy.
