Jyl basynan beri elordada karantin talaptaryn saqtamaǵan 520 zańdy tulǵaǵa 110 mln teńge aiyppul salyndy. Bul týraly búgin Úkimet otyrysynda Nur-Sultan qalasynyń ákimi Altai Kólginov aitty, dep habarlaidy "Ult aqparat".
«Elordada ótken táýlikte indet juqtyrýdyń 250 jaǵdaiy tirkeldi. Virýstyń odan ary taralýyna jol bermeý úshin birqatar is-shara qabyldandy. Birinshiden, infektsiialyq statsionarlarda 2 239 tósek-oryn ázirlendi. Ondaǵy búgingi júkteme 60 paiyzdy quraidy. Qalǵan patsientter úiden em alýda. 198 reanimatsiialyq tósek-oryn ázirlendi, júkteme – 58 paiyz. Rezervte 4 myńǵa jýyq tósek-oryn daiyndalǵan. Ekinshiden, zerthanalar sany 2-den 27-ge deiin ulǵaitylǵan. Onda táýligine 13 myńnan astam test júrgizýge múmkindik bar. Barlyǵy 1 mln 320 myń testieý júrgizildi. Eger jyl basynda kún saiyn 3 myń zertteý júrgizilse, qazir 8 myńnan astam zertteý júrgiziledi», - dedi Altai Kólginov.
Qala ákimi úshinshiden, ambýlatoriialyq qyzmettiń jumysy edáýir jaqsarǵanyn, 250 mobildi brigada jumys isteitindigin aitty. Ambýlatoriialyq baqylaýdaǵy patsientter tegin dári-dármekpen qamtylǵan. Olar tolyqqandy jazylyp shyqqansha ýchaskelik dárigerlerdiń únemi qaraýynda bolady.
«Tórtinshi, karantindik is-sharalardy saqtaý jónindegi monitoring toptar jumysyn jalǵastyrýda. Jyl basynan beri ákimshilik jaýapkershilikke 110 mln teńgege 520 zańdy tulǵa tartyldy. Sot sheshimimen 36 nysannyń jumysy toqtatyldy. «Ashyq» jobasyna 300-den astam kásipkerlik sýbektisi qosyldy», - dedi ol.
Elorda basshysynyń dereginshe, osy ýaqytqa deiin 114 myńnan astam adam vaktsinanyń birinshi komponentin aldy. Ekpe pýnktteriniń sany 36-dan 100-deiin artty. Olardyń jumys ýaqyty 8-den 24-00-ge deiin uzartyldy. Eńbek ujymdaryn vaktsinamen qamtý úshin kóshpeli meditsinalyq brigadalar quryldy.
«Epidemiologiialyq ahýal turaqty baqylaýda. Jumys jalǵasyp jatyr», - dedi Altai Kólginov.
