Qarjy naryǵyn retteý jáne damytý agenttigi baǵaly qaǵaz naryǵyna kásibi qatysýshylardy jáne mikroqarjy uiymdaryn olardyń kiristerdi jylystatýǵa jáne terrorizmdi qarjylandyrýǵa qarsy is-qimyl salasyndaǵy zańnamany saqtaý týraly málimetterdi usynýyn mindetteitin qaýlyny qabyldady, dep habarlaidy QazAqparat.
Bul týraly QR Qarjy naryǵyn retteý jáne damytý agenttiginiń Tóraǵasy Mádina Ábilqasymova Úkimet otyrysynda aitty.
«2017 jyly zańdy tulǵalar arasyndaǵy eń tómen eseptik kórsetkishtiń myń eselengen mólsherinen joǵary somaǵa mámileler boiynsha barlyq esep aiyrysý qolma-qol aqshasyz nysanda júzege asyrylýǵa tiis degen zańnamalyq talap engizildi. 2020 jylǵy sáýirde Ulttyq Bank pen Agenttik zańdy tulǵalardyń bank shottarynan qolma-qol aqshany alý somalarynyń shekti mólsherin belgileitin qaýlyny qabyldady. Qolma-qol aqshasyz ainalymdy keńeitý úshin 25 maýsymda Memleket basshysy tsifrlyq tehnologiialardy retteý máseleleri boiynsha Qazaqstan Respýblikasynyń Zańyna qol qoidy, onda jyljymaityn múlikpen mámileler boiynsha esep aiyrysýdy tek qolma-qol aqshasyz nysanda júrgizý qajettiligi týraly talap kózdelgen. Atalǵan sharalardy iske asyrý úshin agenttik bankter klientteriniń qolma-qol aqshany paidalaný boiynsha belgilengen normalardy saqtaýyna monitoring júrgizedi», - dedi agenttik basshysy.
M. Ábilqasymova sondai-aq kiristerdi jylystatýǵa jáne terrorizmdi qarjylandyrýǵa qarsy is-qimyl boiynsha zańnamaǵa sáikes derbes derekterdi identifikatsiialaý jáne qujattarmen rastaý úshin bank bólimshesinde klienttiń mindetti túrde bolýy talap etilgenin habarlady.
«Agenttik atalǵan talaptardy qaita qarady, klientterdi qashyqtan tekserý tártibi jeńildetildi. Endi azamattar bank shotyn bankterdiń bólimshelerine barmai, elektrondyq tsifrlyq qoltańbany, biometriia quraldaryn nemese tólem kartochkasynyń derektemelerin paidalaný arqyly asha alady. Búgingi kúni 13 bank bank shotyn qashyqtan ashady, olarǵa jeke tulǵalardyń bank shotynyń 99% jatady. Bankterdiń 90% qyzmetterin internet jáne mobildi banking arqyly kórsetedi. 2020 jyldyń basynda 30 mln astam tólem kartochkasy ainalymda. Sońǵy 5 jylda onlain tranzaktsiialar sany 56 mln operatsiiadan 992 mln operatsiiaǵa deiin ósti, al internet-resýrstar men mobildik telefondardy paidalaný arqyly jasalǵan operatsiialar kólemi 2019 jyly 8,1 trln teńge boldy», - deidi M. Ábilqasymova.
Mádina Ábilqasymovanyń aitýynsha, Qazaqstan Respýblikasynyń Aqshany jylystatýmen kúrestiń qarjylyq sharalaryn ázirleý tobynyń (FATF) qatysýshysy bola otyryp, qarjy naryǵynyń barlyq sýbektileriniń kiristerdi jylystatýǵa jáne terrorizmdi qarjylandyrýǵa qarsy is-qimyldyń halyqaralyq standarttaryn saqtaý boiynsha mindettemeleri bar.
«Qazirgi ýaqytta bankter jáne saqtandyrý uiymdary bul talaptar men standarttardy tolyq kólemde saqtaýda, al mikroqarjy uiymdarynyń jáne baǵaly qaǵazdar naryǵyna kásibi qatysýshylardyń qyzmeti rettelmegen bolatyn. Osyǵan bailanysty Agenttik baǵaly qaǵazdar naryǵyna kásibi qatysýshylardy jáne mikroqarjy uiymdaryn olardyń kiristerdi jylystatýǵa jáne terrorizmdi qarjylandyrýǵa qarsy is-qimyl salasyndaǵy zańnamany saqtaý týraly málimetterdi usynýyn mindetteitin qaýlyny qabyldady», - dep túsindirdi agenttik basshysy.
M. Ábilqasymovanyń derekteri boiynsha, 2020 jylǵy qańtar-mamyrda kiristerdi jylystatýǵa jáne terrorizmdi qarjylandyrýǵa qarsy is-qimyl (KJ/TQQ) boiynsha zańnamanyń talaptaryn buzý faktileri boiynsha bankterge qatysty ákimshilik quqyq buzýshylyq týraly 81 hattama jasaldy, jalpy somasy 6 400 AEK aiyppul salyndy, baǵaly qaǵazdar naryǵyna kásibi qatysýshylarǵa qatysty 77 hattama jasaldy jáne jalpy somasy 9 181 AEK aiyppul salyndy, saqtandyrý uiymdaryna qatysty ákimshilik quqyq buzýshylyq týraly 37 hattama jasaldy.
Kóleńkeli ekonomikany tómendetýdiń júielik sharasy retinde agenttiktiń quqyq qorǵaý organdarymen jáne qarjy monitoringi komitetimen jedel ózara is-qimyl jasaýy rettelgen.
Vedomstvoaralyq úilestirýdi jáne jan-jaqty qadaǵalaýdy kúsheitý úshin qarjy monitoringi komiteti, agenttik jáne Ulttyq bank arasynda úshjaqty kelisim ázirlendi.
