Qazaqstanda óndiristen endi ǵana shyqqan nemese importtalyp kelgen kez kelgen ónimge tutynýshyǵa jetkenshe onlain-monitoring júrgizý kerek. Qarjy ministrligi kóleńkeli ekonomikamen osylai kúresýdi jón kórip otyr, dep habarlaidy QazAqparat.
«Birinshiden, biznesti kóleńkede júrgizý – jaǵymsyz piǵyldylardyń isi. Ekinshiden, salyqtan jaltarǵandar óz biznesin jasyryn júrgizgisi keledi. Biraq, ondai kóleńkeli biznes ókilderi Memlekettik kirister komiteti kelip, keleshekte odan da úlken problema týyndatýy múmkin ekenin umytyp ketetin bolýy kerek. Meniń oiymsha, qazirgi tańda salyq tólep, biznesin ashyq júrgizip otyrǵan kásipkerler óz biznesin jabyq júrgizip, jasyryn kóleńkege «kirip ketip» otyrǵandardan shyǵyn kórip otyr. Sol sebepti, básekeli orta bolýy kerek. Iaǵni, jaýapty biznes ókilderi ózi sekildi básekelesterimen jarysa jumys júrgizýge múmkindik alýy tiis. Sonda ǵana Qazaqstanda durys naryqtyq orta jumys júrgizer edi», - dedi QR birinshi qarjy vitse-ministri Berik Sholpanqulov Úkimettiń baspasóz ortalyǵynda.
Onyń aitýynsha, elimizdegi kóleńkeli ekonomika saýda, qurylys salasyn jaýlap alǵan. «Biz qandai shara qabyldap jatyrmyz? Qazaqstandaǵy óndiristen endi ǵana shyqqan nemese importtalyp kelgen kez kelgen ónimge tutynýshyǵa jetkenshe onlain-monitoring júrgizilýi kerek. Taýardyń qozǵalysyna tolyqqandy monitoring bastaimyz. Osy qadam tolyq ashyqtyqty qamtamasyz etip, kóleńkeli ekonomikanyń deńgeiin tómendetedi», - dedi vitse-ministr.
