Jasandy intellekt pen mashinamen oqytý jáne onymen úilesken derekter mólsheriniń kúndelikti ósýi áleýmettik orta men saýda jasaý saltyn ózgertedi. IT salasynyń jetekshi mamandary buǵan qatysty týyndaityn máseleler men saýaldardy únemi óz nazarynda ustaýy qajet.
«Reilly» kompaniiasynyń Londonda ótkizgen «Strata Data» konferentsiiasy úlken kólemdi derekter, mashinamen oqytý jáne jasandy intellekt qandai baǵytta damitynyna baǵdar siltedi. Sońǵy bes jylda bul salalar qarqyndy damyp keledi. Jańa tehnologiialar men baǵdarlamalyq jasaqtamalar kásiporyndar men mekemelerdegi derektermen jumys isteý ádisin túbegeili ózgertti.
«Strata» konferentsiiasy úlken kólemdi derekterdi igerý úrdisiniń damý joldaryn jáne baǵdarlamalyq jasaqtama shyǵarýshylary men tutynýshylaryna qatysty týyndaǵan máselelerdi aiqyndatyn shara. Osy basqosýdan keiin mynadai segiz tujyrym jasaýǵa bolady.
1. 5G bailanysy metabaǵdarlamalardyń damýyna serpin berip, jańa baǵdarlamalyq jasaqtamalar jáne qyzmet berýdiń jańa túrleriniń shyǵýyna ákeledi.
Bul týraly konferentsiia uiymdastyrýshysy jáne «Reilly» kompaniiasynyń bas ǵylymi qyzmetkeri Ben Lorikany áńgimege tartyp kórdik. Ol negizgi faktor retinde 5G bailanysynyń ikemdiligin jáne ótkizý qabiletiniń artýyn ataidy. Bul tehnologiiada álem boiynsha Qytai kósh bastap keledi, degenmen kóptegen firmalar da osy salaǵa investitsiia quiyp, buǵan sáikes óz biznes modelderin qurýǵa bar kúshin jumyldyryp jatyr.
2. Derektermen isteitin mamandardyń jumys daǵdysy ózgeredi.
«Google Cloud» kompaniiasy ǵylymi bóliminiń jetekshisi Kessi Kozyrkovtyń pikirinshe, paidalanýshylar interfeisiniń quraldary jetile bergen saiyn mamandardyń da jumysy jeńildeidi. Olarǵa tehnikalyq bilimnen góri túrli derekqorlarmen jumys istep, ony óz kásibinde qoldaný qabileti qajet bolady.
3. Onlain jáne offlain dúnielerdiń úilesimi.
Ǵalamtorda elektrondy saýdamen ainalysatyn «Alibaba» jáne «Amazon» tájiribe retinde oflain dúkenderin asha bastady. Al qysh pen qurǵaq eritindi qospalaryn satyp júrgen dúkender onlain-saýdaǵa birtindep beiimdelip keledi. Internet alpaýyttarynyń bul qadamyn «shabýylǵa shyǵýy» dep sanasaq, dástúrli saýdagerlerdiń onlain-investitsiialary qorǵaný amaly sekildi kórinedi. Bul josparlaryn tolyq júzege asyrýyna deiin áli biraz ýaqyt ketedi. Alaida úlken kólemdi derekter igerýde jinaqtaǵan mol tájiribes «Amazon» men «Alibaba» sekildi kompaniialarǵa úlken artyqshylyq berip otyr.
4. Ósý men innovatsiialar úshin ishki derekter platformalary qajet bolady.
Konferentsiia barysynda «Lyft» jáne «BMW» kompaniialarynyń mamandary qyzyqty tanystyrylym jasady. Olar derekter platformalary negizinde jańa ónimder shyǵaryp, innovatsiialardy yntalandyratyn biznes-protsessterin qalai basqarýǵa bolatynyn kórsetti. Árine tsifrly salaǵa mamandanǵan «Lyft» kompaniiasy úshin bul ádettegi is bolýy múmkin. Biraq dástúrli ónerkásiptegi kompaniialar da óz ónimderine derektermen jumys isteitin qurylǵyny endirgen kezde, onymen tolyqqandy ainalysýyna týra keledi.
5. Ashyq derekter men bastapqy kody ashyq baǵdarlamalyq jasaqtamanyń mańyzyn durys baǵalaý qajet.
Bastapqy kody ashyq baǵdarlamalyq jasaqtama kóptegen úlken kólemdi derekqorlar jáne metabaǵdarlamalyq ónimder men qyzmet túrleriniń shyǵýyna serpin syilady. Ashyq kodtyń ekonomikalyq jáne tehnikalyq tiimdiligi osydan birneshe jyl buryn dáleldendi. Alaida innovatsiialar úshin ashyq derekterdiń mańyzdylyǵyna az kóńil bólinedi. Al algoritmder sapaly derekterdi óńdegende ǵana jaqsy nátije beredi.
«OpenCorporates» – álemdik kompaniialardyń eń iri ashyq derekqory. Onyń negizin qalaýshylardyń biri ári bas direktory Kris Taggart «bireýdiń menshigindegi derekqorlarǵa súienetin kompaniialar» máselesin qozǵady. Bul jaǵdaida derekter bailanyssyz ári úzik-úzik bolýy múmkin. Oǵan qaraǵanda ashyq derekqorlar aiqyn jáne firmalarǵa aýyr tietin qymbat kelisim-sharttarmen qol bailamaidy.
6. Shynaiy ýaqytta derek jinaý men ony igerýdiń mańyzy.
Jasandy intellekt jáne metabaǵdarlamalar jobalarynda kóbine shynaiy ýaqytta derek jinaý asa qajet emes. Biraq shynaiy ýaqytta derekterdi igerý qabileti básekelestikte eleýli artyqshylyq berýi múmkin. Mekemelerde derekterge negizdelgen sheshimderdi qabyldaý úrdisi etek alyp keledi. Naryqta qalyptasqan jaǵdaiǵa sáikes tez áreket ete alatyn uiymdar básekede utymdy bolady. Osy turǵyda «Amazon Web Services» usynyp otyrǵan qyzmetterdiń aýqymy men alýan túrligi osy quraldar ońailanyp, arzandap júrgenin kórsetedi.
7. Firmalardyń innovatsiialardy endirýi quqyqtyq, etikalyq saýaldardy ózgerte bastady.
Oksford ýniversitetiniń doktory Sandra Vahterdiń baiandamasy óte ózekti máseleni qozǵady. Bul aldaǵy bir-eki jylda eń qyzý talqylanatyn taqyryp bolýy múmkin. Sandra Vahter – derektermen jumys isteýdiń etikalyq turǵysyn zertteitin maman. Onyń aitýynsha, «GDPR», iaǵni jeke málimetterdi qorǵaý boiynsha bas reglament kúshine engendikten, firmalardyń kóbisi osy jaýapkershilikti jete túsinedi. Degenmen baqylaýshy organdar kezdesetin taǵy bir máselege az kóńil bólinip júr. Mekemeler qoldanatyn algoritmder qai derekterge súienip, óz sheshimderin qabyldan júr? Máselen, jumysqa ornalasqanda nemese ipotekaǵa aryz bergende. Ózimiz týraly qandai málimet saqtalyp júrgenin bilýge jáne keibir jaǵdaida ony túzetýge nemese alyp tastaýǵa quqymyz bar. Alaida ádette nesielerdi tekserý jáne meditsinalyq saqtandyrý sekildi salalarda ondai múmkindigimiz bolmaidy.
8. «Dáýleti bardyń áleýeti zor».
Konferentsiia jumysyna qarap otyryp, shaǵyn kompaniialardyń bolashaǵyna alańdai bastaisyń. Internet alpaýyttary men kópshilik qoldy taýarlar shyǵaratyn dúniejúzilik kompaniialardyń úlken kólemdi derekqorlary bar. Al mundai múmkindigi joq firmalar algoritmder negizinde sheshim qabyldaý dáýirinde olarmen qalai básekelese alady? Onlain qyzmettegi osyndai innovatsiialardy utymdy paidalanyp júrgen iri kompaniialardyń orny odan ári kúsheiýi múmkin.
Alaida «Unravel Data Systems» kompaniiasynyń quryltaishysy ári tehnikalyq direktory Shivnat Babý shaǵyn firmalardyń onlaindaǵy jumysynan jáne óz qosymshalarynan derekterdi qoldanýǵa jáne naryqtarǵa áser etýge burynǵydai múmkindigi bar ekendigine sendirdi. Bárine qoljetimdi ashyq derekqorlar sanynyń artýy sońǵy 20 jylda álemdi ózgertip júrgen «Google», «Facebook» pen «Amazon» sekildi jańa startaptardyń shyǵýyna negiz salýy yqtimal.
