Kókjailaý shatqaly Ile-Alataý memlekettik ulttyq parkine qaitaryldy, dep habarlaidy QazAqparat.
«QR Úkimetiniń qaýlysymen Almaty qalasy Medeý aýdanyndaǵy 1002,0 gektar aýmaqty quraityn Kókjailaý shatqaly Ile-Alataý memlekettik ulttyq tabiǵi parkiniń quramyna qaitaryldy», - dep habarlady QR EGTRM Orman sharýashylyǵy jáne janýarlar dúniesi komitetiniń baspasóz qyzmeti
Kókjailaýdyń basym bóligin qylqanjapyraqty shyrsha ormandarynyń biregei ekojúieleri men landshafttar alyp jatyr. Kókjailaý landshafttarynyń estetikalyq qundylyǵy, ásirese Qumbel jotasynyń tómengi bóliginde jaqsy saqtalǵan.
Kókjailaýdyń qoinaýynda QR Qyzyl kitabyna engen Shrenk shyrshasynyń jataǵan pishini (stlannikovaia forma) Sivers almasy, Alataý órigi, ortasha pion, Vittrok raýǵashy, Ostrovskii qyzǵaldaǵy, Alataý báileshegi, syndy t.b ósimdikter ósedi.
Sondai-aq bul meken janýarlar álemine de bai. Sútqorektilerdiń 57 túri, qustardyń 200 túri, baýyrymen jorǵalaýshylardyń 4, qosmekendilerdiń 3 jáne balyqtardyń 4 túri kezdesedi.
Kókjailaýdyń tumsa tabiǵaty týrizm úshin de qolaily. Máselen kelýshiler Medeý jaǵynan da, Almaarasan shatqaly jaǵynan da ońai kóterilip, tabiǵi landshafty qyzyqtai alady.
Eske salsaq, 2014 jyly Úkimettiń qaýlysymen jalpy aýmaǵy 1002 gektar Ile Alataýy memlekettik ulttyq tabiǵi parkiniń jeri airyqsha qorǵalatyn tabiǵi aýmaq sanatynan Almaty qalasynyń Medeý aýdanynyń qory sanatyna «Kókjailaý» taý shańǵysy kýrortynyń qurylysy men jumys isteýi úshin berilgen bolatyn.
2019 jylǵy qazanda Qazaqstan Respýblikasynyń Prezidenti Qasym-Jomart Toqaev jurtshylyqtyń pikirin eskere kelip, «Kókjailaý» shatqalynda taý shańǵysy kýrortyn salý jobasyna tyiym salǵan edi.
2021 jyldyń qazan aiynda Kókjailaý shatqalynda ornalasqan 1002,0 gektar jer ýchaskesin, Ile-Alataý memlekettik ulttyq parkine qaitarý máselesin qarastyrý jónindegi komissiia quryldy.
«Komissiia músheleri memlekettik ekologiialyq saraptamanyń qorytyndysyna sáikes erekshe qorǵalatyn tabiǵi aýmaqtar sanatyna qaitarýdy zańdy dep sanady. Kókjailaý shatqalynyń tabiǵi bailyǵyn saqtap qalý bizdiń ortaq mindetimiz», - dep qosty vedomstvadan.
