Biyl egis jumystaryn júrgizýge 400 myń tonna kóleminde dizel otyny bólindi, dep habarlaidy QazAqparat.
Bul jóninde QR Aýyl sharýashylyǵy birinshi vitse-ministri Aidarbek Saparov Úkimet otyrysynda málim etti.
«Biyl egis jumystaryn júrgizýge 400 myń tonna kóleminde dizel otyny bólindi. Bul ótken jylmen salystyrǵanda 20 myń tonnaǵa artyq.
Qazirgi ýaqytta oblys ákimdikteri keiinnen aýyl sharýashylyǵy taýaryn ónimderin ótkize otyryp, munai óńdeý zaýytynan óńirlerge dizel otynyn satyp alýdy jáne jetkizýdi qamtamasyz etetin operatorlardy aiqyndaý jónindegi is-sharalardy aiaqtaýda. Ońtústik óńirlerde júk tieý bastaldy», - dedi ministrdiń orynbasary.
Onyń deregi boiynsha, saraptamaǵa 1,5 mln tonna jazdyq daqyldar tuqymy kelip túsken.
«Onyń 1,3 mln tonnasy nemese 90% tekserildi. Tekserilgen tuqym kóleminiń 99%-y konditsiialy dep tanylsa, 89,3% egis standartynyń 1 jáne 2-klasyna sáikes keledi.
Sońǵy bes jylda tuqym óndirýshilerdi egis tehnikasymen qamtamasyz etý 70%-dan 89,4%-ǵa deiin, egin jinaý 80%-dan 92%-ǵa deiin, tuqym tazalaý 63%-dan 81,4%-ǵa deiin óskenin atap ótken jón.
Bul rette tuqym óndirýshilerdiń materialdyq-tehnikalyq bazasyn jańartýdyń ósý qarqyny sońǵy jyldarǵa keledi. Osylaisha, respýblikanyń barlyq derlik aimaqtarynda zamanaýi tuqym tazartý keshenderimen jabdyqtalǵan aldyńǵy qatarly tuqym sharýashylyqtary bar.
Ótken jyldyń aýa-raiy jaǵdaiy tuqymnyń sany men sapasyna áser etti. Sondyqtan bul máseleni ákimdikter erekshe baqylaýda ustaýy qajet», - dedi Aidarbek Saparov.
