Prezidenttiń tapsyrmasymen «Qarapaiym zattar ekonomikasy» baǵdarlamasy aiasynda kóktemgi egis jumystaryn júrgizýge qosymsha 100 mlrd teńge bólindi, dep habarlaidy "Ult aqparat".
«Qazirgi ýaqytta egis naýqany ońtústik óńirlerde júrgizilip jatyr. Osylaisha Jambyl oblysynda 249,5 myń ga nemese jazdyq egis alańynyń 67 paiyzynda, Túrkistan oblysynda 167,5 myń ga aýmaqqa (25,5%), Almaty oblysynda 97,1 myń ga (15,6%), Qyzylorda oblysynda 23,9 myń ga (17,6%) alqapta egis jumystary júrgizildi», - dedi Aýyl sharýashylyǵy vitse-ministri Aidarbek Saparov onlain rejimde OKQ-da ótken baspasóz máslihatynda.
Vitse-ministr Memleket basshysynyń 2020 jylǵy 31 naýryzdaǵy tapsyrmasyn oryndaý aiasynda aýyl sharýashylyǵy taýaryn óndirýshiler úshin respýblika boiynsha dizeldik otynnyń litriniń baǵasy 165 teńge bolatynyn jetkizdi.
«Sonymen qatar, Prezidenttiń tapsyrmasymen «Qarapaiym zattar ekonomikasy» baǵdarlamasy aiasynda kóktemgi egis jumystaryn júrgizýge qosymsha 100 mlrd teńge bólindi. Sýbsidiialaýdy esepke ala otyryp, sońǵy syiaqy mólsherlemesi qaryz alýshylar úshin jyldyq 6 paiyzdy quraidy. Bul sharýalardy ainalym qarajatymen, tuqym, tyńaitqyshtar, ósimdik qorǵaý quraldarymen, qosalqy bólshektermen qamtamasyz etýge múmkindik beredi», - dedi ol.
