Sý tasqynymen kúreske 10 myńnan astam qutqarýshy daiyn. Bul týraly QR Tótenshe jaǵdailar birinshi vitse-ministri Ibragim Kúlshimbaev aitty, dep habarlaidy QazAqparat.
«Kóktemgi kezeńdegi tótenshe jaǵdailardyń saldaryn joiý boiynsha TJM Respýblikalyq jedel shtaby men jedel tobynyń quramy anyqtaldy. Jeke quramnyń jalpy sany 10 myń adamnan astam jáne 1880 birlikten astam tehnikasy bar azamattyq qorǵaý kúshteri men quraldarynyń toptamasy quryldy. Onyń ishinde 22 tikushaq, 308 júzý quraly men shamamen bir myń motopompa bar. Kúshterdi jedel aýystyrý jáne zardap shekken halyqty shuǵyl evakýatsiialaý jaǵdaiynda «Qazaviaqutqarý» AQ tikushaqtary ázirlikte bolady», - dedi ol Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, TJM Azamattyq qorǵanys áskeri bólimderinde zardap shekken turǵyndar úshin 1000 adamǵa arnalǵan 3 shatyrly lager ázirlengen.
«Halyqty qulaqtandyrý, onyń ishinde teleradio jiilikterine qosylý, SMS-habarlamalar jiberý, internet-resýrstardy paidalaný jáne daýys ulǵaitqysh qurylǵylary bar patrýldik politsiia avtomashinalaryn tartý máseleleri pysyqtaldy. Sý resýrstary jónindegi komitetpen jáne Qazgidrometpen der ýaqytynda basqarýshylyq sheshimder qabyldaý úshin jedel aqparat almasý boiynsha is-qimyldyń birlesken jospary ázirlendi», - dedi Ibragim Kúlshimbaev.
