Semei qalasynda kóktaiǵaqtan 6 kólik soqtyǵysyp qaldy, dep habarlaidy QazAqparat.
ShQO Politsiia departamenti baspasóz qyzmetiniń málimetine súiensek, jol-kólik oqiǵasy 16 qazanda saǵat 08.30-da jańa kópirde bolǵan.
«Lada Granta markaly kóliktiń 23 jastaǵy júrgizýshisi kóktaiǵaqtan rýldi basqara almai qalyp Mitsubishi, Volgswagen jáne Hyundai kólikterimen soǵyldy. Sonyń saldarynan Hyundai kóligi taǵy eki Toyota kólikterimen soqtyǵysqan», - dep habarlady vedomstvo ókilderi.
Jol apatynan eshkim zardap shekken joq. Qazirgi ýaqytta politsiia qyzmetkerleri oqiǵanyń mán-jaiyn anyqtap jatyr. Tiisti saraptamalar da taǵaiyndalǵan.
