Kókshetaýdyń irgesinde ornalasqan aýyl úilerin sý shaiyp, 43 adam qaýipsiz jerge kóshirildi, dep habarlaidy QazAqparat tilshisi.
TJD málimeti boiynsha tótenshe jaǵdai aǵymdaǵy jyldyń 11 sáýirinde tańǵy 05:45 shamasynda Zerendi aýdanynyń Shaǵalaly aýylynda oryn alǵan.
"Shaǵalaly ózeniniń sýy kóterilýi saldarynan aýyldaǵy 4 úi men 9 úidiń aýlasyn sý shaiyp ketti. Osynyń saldarynan 43 adam (onyń ishinde 9 bala) jáne 154-ke jýyq úi janýarlary qaýipsiz jerge kóshirildi.
Qazirgi kezde sý sorý jumystaryna TJD jeke quramynan 21 adam jáne 9 tehnika men 4 júzý quraly, jergilikti atqarýshy organdardan 3 adam jáne 1 tehnika, jergilikti politsiia qyzmetinen 4 adam jáne 1 tehnika jumyldyrylyp, sý tasqynynyń saldaryn joiý sharalaryn júrgizýde", - dep túsindirdi TJD baspasóz qyzmetinen.
