Foto: Aslan Ospanov/Kazinform
Kókshetaýda Ulttyq dombyra kúnine orai «Kieli dombyra» oblystyq fleshmob ótip, onda 2500 jýyq dombyrashy bir mezette Qurmanǵazynyń «Balbyraýyn», «Saryarqa», «Adai» jáne Abylai hannyń «Shańdy joryq» kúilerin oryndady, dep habarlaidy «Ult aqparat» Kazinform-ǵa silteme jasap.
«Oqjetpes» stadionynda uiymdastyrylǵan aýqymdy sharaǵa Úkili Ybyrai atyndaǵy Aqmola oblystyq filarmoniiasy, «Kókshetaý» mádeniet saraiy, M.Jumabaev atyndaǵy Aqmola oblystyq ǵylymi ámbebap kitaphanasy, Oblystyq halyq shyǵarmashylyq jáne mádeni demalys ortalyǵy, Aqmola oblystyq tarihi-ólketaný, Kókshetaý qalasy tarihy, Málik Ǵabdýllin, Ádebiet jáne óner mýzeileri, Tarihi murany qorǵaý jáne paidalaný ortalyǵynyń qyzmetkerleri, Kókshetaý qalasy «Dostar» mádeniet saraiynyń shyǵarmashylyq ujymdary, sonymen qatar, Birjan sal, Aqkól, Arshaly, Atbasar, Býrabai, Jaqsy, Ereimentaý, Esil, Jarqaiyń, Zerendi, Shortandy, Tselinograd aýdandary men Kókshetaý qalasynyń bilim jáne mádeniet oshaqtary, Memlekettik shyǵarmashylyq tapsyrys qatysýshysy — «Shabyt» bilim jáne shyǵarmashylyq ortalyǵy tárbielenýshileri, Aqmola oblystyq soty, memlekettik organdar, Aqmola oblysy densaýlyq saqtaý basqarmasynyń qyzmetkerleri men qala turǵyndary qatysty.
Barlyǵy 2500-ge jýyq dombyrashy bir mezette Qurmanǵazynyń «Balbyraýyn», «Saryarqa», «Adai» jáne Abylai hannyń «Shańdy joryq» kúilerin oryndap, kópshilikti tánti etti.
Sharada Aqmola oblysy mádeniet basqarmasynyń basshysy Aigúl Sábitova aimaq basshysy Marat Ahmetjanovtyń atynan jinalǵandardy quttyqtap, ulttyq ónerdi nasihattap júrgen aqmolalyqtarǵa alǵys bildirdi.
«Dombyra degenimiz — jai ǵana aspap emes, ol babalarymyzdan qalǵan asyl mura, ár qazaqtyń rýhy men jany. Án men kúidiń besigi sanalatyn arqa tóri Aqmola óńiri úshin bul merekeniń orny erekshe. Qazaq tarihynyń óner áleminde tanymal Qurmanǵazy, Dáýletkerei, Táttimbet, Mahambet, Dina, Súgir, Qazanǵap syndy kúi qyrandarynyń jolyn ustanǵan urpaqtar, kúi óneriniń darabozdary, kúishi-dombyrashylar kúni búgin de ǵasyrdan ǵasyrǵa ulasqan babalar dástúrin jalǵastyrýda», — dedi basqarma basshysy óz sózinde.
Aqmola oblysy mádeniet basqarmasynyń málimetinshe, búgingi tańda Aqmola oblysynda 24 folklorlyq ansambli bar (qatysýshylar sany — 345), 30-dan astam dástúrli ánshi, 10 qazaq ulttyq aspaptar orkestri (qatysýshylar sany — 275), 12 dombyra úiirmesi bar (qatysýshylar sany — 212), memlekettik shyǵarmashylyq tapsyrys boiynsha 6 tegin úiirme (qatysýshylar sany — 700) jumys isteidi.
Aita ketsek, budan buryn Kókshetaýda vokaldy-aspaptyq ansamblder men kaver toptar arasynda Aqmola oblysynyń 85 jyldyǵyna arnalǵan «Sálem, Kókshetaý!» oblystyq baiqaý-festivali ótkenin jazǵan edik.
