Kókshetaý qalasynda Qazaqstan Respýblikasy Táýelsizdiginiń 28 jyldyǵyna arnalǵan «Táýelsiz elimdi jyrlaimyn» atty aqyndar músháirasy ótti. Bul týraly oblystyq ishki saiasat basqarmasy habarlady.
Elbasynyń «Bolashaqqa baǵdar: rýhani jańǵyrý» baǵdarlamalyq maqalasyn júzege asyrý, sondai-aq «Aqmola – adaldyq alańy» jobasy sheńberinde Kókshetaý qalasynyń mádeniet jáne tilderdi damytý bólimi uiymdastyrǵan músháiranyń maqsaty - jas urpaqqa patriottyq tárbie berý, parasattylyq, adaldyq qaǵidalaryn qalyptastyrý, ulttyq rýhani murany nasihattaý.
Baiqaýǵa 16-29 jas aralyǵyndaǵy 26 talantty aqyndar men oryndaýshylar qatysty. Jas aqyndar Petropavl, Semei, Nur-Sultan, Stepnogorsk jáne Kókshetaý qalalaryn tanystyrdy.
Qazylar alqasynyń quramynda Qazaqstan Jazýshylar odaǵynyń múshesi, Qazaqstan Jýrnalister odaǵynyń Aqmola oblystyq filialynyń tóraǵasy Serik Jetpisqaliev, Sh.Ýálihanov atyndaǵy Kókshetaý memlekettik ýniversitetiniń oqytýshysy filiologiia ǵylymdarynyń kandidaty, dotsent Sábit Jámbek, aqyn Qýanysh Ospan, Aqmola óńirlik «Rýhani jańǵyrý» jobalyq keńsesiniń jetekshisi Qairat Seitqazin, Sh.Ýálihanov atyndaǵy memlekettik ýniversiteti tarih pániniń oqytýshysy Talapker Ýáliev boldy.
Is-sharaǵa Aqmola oblysy boiynsha sybailas jemqorlyqqa qarsy is-qimyl departamenti basshysynyń birinshi orynbasary Arman Berdalin qatysyp, aqyndar qoǵamnyń sybailas jemqorlyqqa qarsy mádenietin qalyptastyrýda mańyzdy ról atqaratynyn atap ótti. Belgili bolǵandai, sybailas jemqorlyq qazirgi zamannyń ótkir máseleleriniń biri bolyp tabylady, sondyqtan adaldyq, adamgershilik, satylmaýshylyq siiaqty qundylyqtardy nasihattaý arqyly aqyndar joǵary mádenietti jáne patriottyq sana sezimdegi óskeleń urpaqty qalyptastyrýǵa erekshe úles qosady.
Baiqaý qorytyndysy boiynsha Bas júldeni M. Jumabaev atyndaǵy Aqmola oblystyq ámbebap-ǵylymi kitaphanasynyń qyzmetkeri Oralbek Núrish jeńip aldy. Birinshi oryndy Ortalyq Qazaqstan Akademiiasynyń stýdenti Asemgúl Serikbol, ekinshi oryndy - Nur-Sultan qalasynan Abylai Máýlen men Petropavl qalasynan Abylaihan Áshimhan jáne úshinshi oryndy Semei qalasynan Elaman Ospan jáne Kóken Shákeiuly atyndaǵy aqyndar mektebiniń shákirti Uǵylan Qarashash ielendi. Jeńimpazdar alǵys hat jáne estelik syilyqpen marapattaldy.
