Elordada «Otandastar qory» KEAQ janyndaǵy qoǵamdyq komissiianyń otyrysy ótti. Jiynda qandastarǵa qatysty qordalanǵan máseleler jan-jaqty talqylandy, dep habarlaidy "Ult aqparat" qordyń baspasóz qyzmetine silteme jasap.
Keńes otyrysynda QR Bilim jáne ǵylym ministrligi tarapynan shet elderdegi etnikalyq qazaqtarǵa oqýlyqtar men ádebi kitaptar jiberý, Aqmola oblysynyń Krasnyi Iar, ShQO Shyǵys aýylyndaǵy shetelden kóship kelgen qandastarymyzǵa berilgen arendalyq úidiń búgingi jaǵdaiy jáne Repatriatsiiany yntalandyrý (úi-jaimen, jer telimderimen, kóterme qarjylarmen qamtý) máseleleri qozǵaldy.
Sheteldegi qandastarymyzǵa arnalǵan kitap daiyndaýda qajetti oqýlyqtarǵa áli de basymdyq berilmegeni aityldy. Qoǵamdyq komissiia músheleri qajetsiz kitap shyǵarý jobasyn qysqartyp, qandastar turatyn memlekettermen kelisý arqyly suranysqa sai kitap shyǵarylsa degen oilaryn jetkizdi.
Atajurtqa kelip órisi keńigen aǵaiynnyń osydan 5-10 jyl buryn qýanyshy eselengen edi. Krasnyi Iar men Shyǵys aýylynan 2-3 bólmeli úi alyp, qonys toiyn toilaǵan jurttyń shattyǵy uzaqqa sozylmady. Sharshy metrine - 88 teńge, orta eseppen bir úidiń ailyq arendalyq quny 6866 teńge bolyp baǵalanǵan. Búgingi kúnde 276 otbasy sapasyz salynǵan úilerdiń arendalyq quny úshin memleketke 73,4 mln teńge qaryz. Turǵyndar sapasyz salynǵan úiler úshin arendalyq aqshany tóleýden bas tartyp otyr.
«2019 jyly qarasha aiynda áriptesterimizben Kókshetaý qalasy, Krasnyi Iar aýylyndaǵy úilerdi kózimizben kórdik. Kún endi sýyta bastaǵan edi. 10-15 úidi araladyq. Úilerdiń jalpy jaǵdaiy adam aitqysyz dárejege jetken. Úi qabyrǵalary óte juqa, irgetasy joq, edenderine qaraqaǵaz tóselgen. Tóbe jaqtaýlary óte juqa salynǵan. 2009-2010 jyldary «Nurly kósh» baǵdarlamasymen salynǵan úilerdiń árbirine sol kezdegi dollar baǵamymen 59 myń dollar qarjy jumsalǵan. Osy úilerdiń sapasyz salynǵanyn, qarjynyń talan-tarajyǵa túskenin aityp, bir top depýtat Úkimet basshysy Asqar Uzaqbaiulyna depýtattyq saýal jiberdik. Bul máseleni sheshýdiń bir joly - barlyq úidi jerimen birge jekeshelendirip berý qajet», - dedi qoǵamdyq komissiia men QR Parlamenti Senatynyń Áleýmettik – mádeni damý jáne ǵylym komitetiniń tóraǵasy Murat Baqtiiaruly.
Qoǵamdyq komissiia otyrysyna Kókshetaý qalasy ákiminiń orynbasary Beibit Júsipov qatysyp, komissiia músheleri qoiǵan suraqtarǵa jaýap berdi.
«Qazirgi ýaqytta 137 turǵyn úidiń 35-i kúrdeli jóndeýdi jáne 102 aǵymdaǵy jóndeýdi qajet etedi. Kókshetaý qalasy ákimdigi shaǵynaýdanda salynǵan turǵyn úilerdi tehnikalyq tekserý úshin qarjy bóledi. Tekserý júrgizýge 2020 jyly barlyǵy 15,7 mln teńge bólý josparlanǵan. Shilde aiyna deiin turǵyndarǵa úii men jeriniń jańa qujatyn daiyndap berý jumystary bastaldy», - deidi Kókshetaý qalasy ákiminiń orynbasary Beibit Aitymuly.
Qytaidan kelgen qandasymyz Rahym Aiyp elge keletin qandastarymyzdyń basym bóligi eginshi-malshy ekenin alǵa tartty. Osy oraida aldaǵy ýaqytta «sharýashylyqpen ainalysqysy keletin azamattar úshin memleket jer bere ala ma?» degen suraǵyn qoidy. Aýyl sharýashylyǵy ministrliginen kelgen jaýapty qyzmetker Aqmola, Shyǵys Qazaqstan, Pavlodar, Qostanai oblystarynda memleket ieliginde jer bar ekenin, sharýashylyqpen ainalysqysy kelgen qandastarǵa jer beriletinin jetkizdi.
