Qutqarýshylar kúni qarsańynda Kókshetaý qalasynda kópqabatty turǵyn úidiń qasbetine qazaqstandyq qutqarýshylarǵa arnalǵan art-nysan salyndy, dep habarlaidy QazAqparat oblystyq ishki saiasat basqarmasyna silteme jasap.
Jambyl oblysynda oq-dári qoimasynda oryn alǵan órt pen jarylysty joiý kezinde qaza tapqan Túrkistan oblysy tótenshe jaǵdailar departamentiniń órt sóndirý jáne azamattyq qorǵaý júiesi qyzmeti bastyǵynyń orynbasary, polkovnik Meiirjan Aimanov beinelengen mýral Abylai han dańǵylyndaǵy 9 qabatty turǵyn úidiń qasbetinde salyndy.
Batyr-qutqarýshynyń portretin Tótenshe jaǵdailar departamenti men oblys ortalyǵy ákimdiginiń bastamasymen jergilikti «Design city» kompaniiasynyń ujymy jasaǵan. Sýretshiler mýraldy salý úshin 5 kún jumys istedi.
Aqmola oblysy tótenshe jaǵdailar departamentiniń bastyǵy Nurlan Atyǵaevtyń aitýynsha, art-nysan batyrdy eske alý úshin jáne arnaiy kásibi mereke - Qutqarýshylar kúnine orai, 19 qazan kúni ashylyp otyr.
«Qutqarýshylardyń jumysy óte qaýipti. Olar únemi ózgeniń ómirin saqtap qalý úshin óz bastaryn qaterge tigedi, olar qiyndyqtyń ne ekenin bilmeidi. Bizdiń mindettimiz qaitsekte adamdardy qaýip-qaterden qutqarý. Búginde oblysta 1377 órt sóndirýshi-qutqarýshy qyzmet atqarady. Osy igi iske qoldaý bildirgen qala basshylyǵyna alǵysymyz sheksiz», - dep atap ótti Nurlan Atyǵaev.
Turǵyndar da turǵyn úidiń qabyrǵasyna sán berip turǵan strit-art sýretin qoldap, búginginiń batyrlarynyń erligi maqtanyshqa ainalatynyn atap ótti.
«Órt sóndirýshiniń bul portreti halyqtyń nazaryn otpen abailap jumys isteýge aýdarady jáne órt sóndirýshi mamandyǵyna degen qurmetti odan ári arttyrady dep úmittenemiz», - dep túsindirdi Kókshetaý qalasynyń turǵyny Azamat Baltabaev.
Aita ketsek, Kókshetaý qalasyndaǵy 22 turǵyn úi alaby strit-art kompozitsiialarymen bezendirilgen.
