Kókshetaý qalasynda kópbalaly, tolyq emes, áleýmettik jaǵynan az qamtylǵan otbasylar men jetimderge 70 páterdiń kilti tapsyryldy, dep habarlaidy QazAqparat.
«Saryarqa» shaǵyn aýdanynda ótken sharaǵa Aqmola oblysy ákimi Ermek Marjyqpaev qatysyp, turǵyndarǵa jańa páter kiltin tapsyrdy. Atalǵan túrǵyn úi memlekettik «Nurly jer» baǵdarlamasy boiynsha salynyp otyr. Kópqabatty jańa turǵyn úiden baspanaly bolyp otyrǵandar arasynda kópbalaly jáne áleýmettik jaǵynan az qamtylǵan otbasylar, jetimder bar.
«Óńirde turǵyndardy baspanamen qamtamasyz etý máselesi erekshe nazarda. Memleket basshysynyń bastamasymen qolǵa alynǵan «Nurly jer» baǵdarlamasy Aqmola oblysynda oidaǵydai júzege asyrylýda. Munyń bári turǵyndardyń múddesi úshin. Ótken jyly bul baǵytta qyrýar sharýa atqaryldy. Biyl da sol kórsetkishterge qol jetkizetin bolamyz. Búgin mine, alǵashqy 70 páterdiń kiltin tapsyryp otyrmyz. Osyndai igi isterge qol ushyn sozyp otyrǵan azamattarǵa úlken alǵysymdy bildiremin», - dedi Ermek Marjyqpaev jańa páter ielerin quttyqtaý sózinde.
Páter alyp qýanyshqa kelgenderdiń biri, «Altyn alqa» iegeri, 10 bala tárbielep ósirgen Svetlana Sádýaqasova QazAqparat tilshisine ózińniń qýanyshymen bólisti.
«Páter kezeginde turǵanyma biyl 14 jyl bolady. 10 bala tárbielep ósirdim. Osyǵan deiin páter jaldap turdym. Árine, qiyndyqtar boldy. Aqshasyn tóleseńde bireýdiń qas-qabaǵyna qarap júrý ońai emes. Páter jaldap júrgen kez ben qazirgi jaǵdaiymdy salystyrýǵa bolmaidy. Qýanyshymda shek joq. Ana retinde barsha qazaqtandyqtarǵa baspana baqytyn tileimin»,- dedi Batyr ana Svetlana Sádýaqasova.
Sonymen qatar, baspanaly bolǵandardyń arasynda balalar úiiniń tárbielenýshileri de bar.
«Men balalar úiinen 2010 jyly shyqtym. Sodan beri páter kezeginde turmyn. Qazir óz otbasym bar, eki balanyń ákesimin. Ózimdi baqytty sezinemin. Biraq búginge deiin óz úiim bolǵan joq. Búgin maǵan eki bólmeli páter berdi. Osyndai igi isterge qol ushyn sozyp otyrǵan úlken alǵysymdy bildiremin»,- dedi jańa páter iesi Roman Chep.
Aita keteiik, búgingi kúni Kókshetaý qalasynda 2 myńnan astam kóp balaly otbasy bolsa, onyń 400 jýyǵy páter kezeginde tur. Sonydqtan, biylǵy jyly barlyǵy 470 páter kiltin tapsyrý josparlanǵan. Onyń birazy Turǵyn úi qurylys jinaq banki arqyly sheshimin tappaqshy.
