Kókshetaýda erli-zaiypty qariialardy asa qatygezdikpen óltirgen kúdiktige qatysty sot úkimi shyqty, dep habarlaidy "Ult aqparat".
Aqmola oblystyq sotynyń baspasóz qyzmetinen málim etkendei, Aqmola oblysynyń qylmystyq ister jónindegi mamandandyrylǵan aýdanaralyq sotynyń úkimimen kúdikti Vadim Dostov 25 jylǵa sottaldy.
«Sot úkimimen ol Qylmystyq kodekstiń 191, 24, 188, 192, 99 jáne 287-baptary boiynsha kináli dep tanyldy. Endi ol aldaǵy 25 jylyn qaýipsizdigi tótenshe qylmystyq atqarý júiesi mekemesinde ótkizetin bolady. Vadim Dostovtyń árketinde qylmystardyń qaitalaný qaýpi bar dep tanyldy. Sonymen birge, odan zardap shekken tarapqa 20 million teńge somasynda moraldyq ótemaqy óndirilip alyndy», - dedi Aqmola oblystyq sotynyń baspasóz qyzmetindegiler.
Sot úkimi kúshine engen joq.
Eske sala keteiik, biylǵy jyldyń sáýir aiynda Kókshetaý qalasynda erli-zaiypty qariialardy óz páterinde belgisiz bireý asa qatygezdikpen óltirip, tonap ketken edi. Politsiia kóp uzamai kúdiktini ustaǵan bolatyn.
