Kókshetaýda bes qabatty turǵyn úide gaz balony jaryldy. Saldarynan eki adam zardap shekti, dep habarlaidy QazAqparat oblystyq Tótenshe jaǵdailar departamentiniń baspasóz qyzmetine silteme jasap.
Vedomstvonyń málimetinshe, tótenshe jaǵdai qazannyń 12-de keshki saǵat 19:05-te Kóktem «5» meken-jaiy boiynsha ornalasqan 5 qabatty turǵyn úidiń 2-shi qabatyndaǵy páterde bolǵan.
«Oqiǵa ornyna TJD jeke quramynan 22 qyzmetker men 6 arnaiy tehnika, jedel járdem qyzmeti brigadasynyń 12 qyzmetkeri men 4 tehnikasy, politsiia basqarmasynyń 16 qyzmetkeri men 7 tehnikasy jumyldyryldy», - dedi vedomstvodan.
Vedomstvonyń baspasóz qyzmetinen atap ótkendei, jarylys saldarynan páterler arasyndaǵy gipsokartonnan jasalǵan páteraralyq qabyrǵa men balkon qiraǵan.
«Órt sóndirý qyzmetkerleri úsh iindi baspaldaqtyń kómegimen 3 adamdy (onyń ekeýi bala) evakýatsiialady. Oqiǵa ornynda meditsinalyq kómekke 2 adam júgindi. Onyń biri jarylys bolǵan páterdiń turǵyny 1970 jylǵy er adamnyń aiaǵyn 20 paiyz kúiik shalsa, taǵy bir 1994 jylǵy turǵyn zardap shekti. Ekeýiniń de jaǵdailary qanaǵattanarlyq. Oqiǵa ornynda TJD kúshimen mobildi jylytý pýnkti uiymdastyrylyp, atalmysh úi turǵyndaryna psihologiialyq kómek kórsetildi, sondai-aq (52-09-50) nómiri boiynsha jedel jeli uiymdastyryldy», - dep tolyqtyrdy vedomstvodan.
