Kókshetaý turǵyny balyq aýlaý kezinde qola dáýirindegi Andronov mádenietine jatatyn keramikalyq ydystardyń synyqtary men súiekterdi taýyp aldy.
Bul týraly oblystyq tarihi-ólketaný murjaiynyń direktory Qýanysh Shaqshaqov aitty, dep habarlaidy "Ult aqparat".
Kókshetaý qalasynyń 35 jastaǵy turǵyny Kamil Ýsmanov balyq aýlap júrip mundai oljaǵa kenelemin dep oilaǵan joq.
«Jeksenbi kúni dostarymen birge Shaǵalaly sý qoimasyna balyq aýlaýǵa bardyq. Jaǵadaǵy topyraqty sý shaiyp, opyrylyp tústi. Sol jerden biz kóp súiekti taptyq. Bul meni qyzyqtyrdy, osyndai jerlerden tarihi eskertkishter tabylatynyn oqyǵan edim. Tórt tis taptym. Maǵan ol óte úlken kórindi. Keiin biz Berezovka jaǵyna bardyq. Ol jerde sý qoimasynyń ózenge quiatyn tusynda biik jar bar. Sol jerde biz keramikalyq ydystardyń synyqtary men usaq monshaq taptyq», - deidi Kamil Ýsmanov.
Er adam tapqan tarihi qundy oljalaryn Aqmola oblystyq tarihi-ólketaný murjaiyna tapsyrǵan. Belgili bolǵandai, kóne jádigerler qola dáýirine tiesili.
«Tabylǵan keramikalyq ydystardyń synyqtarynda geometriialyq oiýlar bar. Sol sebepti, biz ony shamamen Alakól mádenietine tán dep otyrmyz. Biz barlyq arheologiialyq eskertkishterdiń málimetterin qarap shyqtyq. Olardyń arasynda osy jerleý rásimi tirkelgen joq. Onyń erekshiligi ol topyraqpen jerleý qataryna jatady, ústinen kómilmegen. Qasynda qola dárindegi turaq bolǵan. Men ózim ony osynda jerlengen dep esepteimin. Óitkeni, ol jai adam emes, shaman nemese kósem bolýy múmkin. Sol sebepti, turaqta, rýhy qorǵashtap júrsin dep jerlengen», - deidi Qýanysh Shaqshaqov.
Murajai direktory atap ótkendei, kóne jádigerler tabylǵan aýmaqta aldaǵy ýaqytta zertteý jumystary júrgiziletin bolady.
