Aqmola oblystyq máslihatynyń kezekti sessiiasynda Kókshetaý mektepterine Abai men Ál-Farabi esimderin berý týraly usynys engizildi. Bul týraly aimaq basshysy Ermek Marjyqpaev áleýmettik jelidegi paraqshasynda málimdedi, dep habarlaidy "Ult aqparat".
Oblys ákimi selektorlyq rejimdegi Aqmola oblystyq máslihatynyń kezekti sessiiasyna qatysqan. Jiynda óńirde týrizmdi damytýdyń ahýaly men bolashaǵy, Aqmola oblystyq máslihatynyń 2019 jylǵy qyzmeti týraly esep, oblys boiynsha qorshaǵan orta sapasynyń nysanaly kórsetkishterin bekitý, jasyl ekpelerdi kútip-ustaý jáne qorǵaý qaǵidalaryn bekitý jaiy qaralǵan.
«Sonymen qatar, «Aqmola oblysy boiynsha áleýmettik mańyzy bar qatynastardyń tizbesin aiqyndaý týraly» oblystyq máslihattyń 2019 jyldyń 10-shy sáýirindegi sheshimine ózgerister engizý talqylandy, budan bólek, Aqmola oblysynda syrtqy (kórneki) jarnamany eldi mekenderdegi úi-jailardyń sheginen tys ashyq keńistikte, jalpyǵa ortaq paidalanylatyn avtomobil joldarynyń bólingen beldeýinde, eldi mekenderden tys jerdegi úi-jailardyń sheginen tys ashyq keńistikte jáne jalpyǵa ortaq paidalanylatyn avtomobil joldarynyń bólingen beldeýinen tys jerde ornalastyrý tártibi men sharttary týraly erejeler bekitildi. Ishki saiasat basqarmasymen №3 oblystyq mamandandyrylǵan mektep-internatyna Abai esimin, IT mektep-litseiine Ál-Farabi atyn berý týraly usynys engizildi», - dep jazdy Ermek Marjyqpaev Instagram-daǵy paraqshasynda
Aimaq basshysy atap ótkendei, máslihat sessiiasynda oblys ákimdiginiń janynda jumys isteitin konsýltativtik-keńesshi organdardaǵy ózgerister boiynsha 7 sheshim qabyldandy.
«Buryn kún tártibinde málimdelgen 2020-2022 jyldarǵa arnalǵan oblystyq biýdjetke ózgerister engizý týraly másele Respýblikada tótenshe jaǵdai engizilýine bailanysty aldaǵy ýaqytta memlekettik biýdjetti ońtailandyrýǵa orai respýblikalyq biýdjet naqtylanǵanǵa deiingi merzimge aýystyryldy», - dep tolyqtyrdy aimaq basshysy.
