Kókshetaýlyqtar qalanyń ortalyq alańynda qyrshyn ketken qysqy olimpiada oiyndarynyń júldegeri Denis Tendi bir minýt únsizdikpen eske alyp, portretine gúl shoqtaryn qoidy, dep habarlaidy QazAqparat tilshisi.
Sharaǵa barlyǵy myńǵa jýyq kókshetaýlyq pen qala qonaqtary qatysty. Jinalǵandar tanymal sportshy portretiniń aldyna shyraq tutatyp, eske alý rásimin jasady. Olardyń arasynda eresekter men balalar da boldy. Jurtshylyq Denistiń jarqyn beinesin eske alyp, kóz jasyna erik berdi.
"Únemi jarqyrap júretin Denistiń jarqyn beinesi bizdiń júregimizde məńgi saqtalady. Ol biz úshin otandyq sporttaǵy mánerlep syrǵanaýdan eń úzdik sportshy. Bairaqty jarystarda el mártebesin asqaqtatqan onyń qazasy qazaqstandyqtar úshin aýyr tiip otyr", - dep eske aldy kókshetaýlyqtar.
Aita ketsek, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
Búgin belgili bolǵandai, sportshynyń ólimine qatysy bar eki kúdiktiniń biri ustalyp, ol qylmysyn moiyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqai aýylynyń týmasy Arman Qudaibergenovke izdeý jariialandy.
