Kókshetaýda «Tekti sózdiń tóresi - terme» atty jyrshy-termeshilerdiń oblystyq baiqaýy óz máresine jetti.
Is-shara «Rýhani jańǵyrý» baǵdarlamasy aiasynda Jastar jylyna orai uiymdastyrylyp otyr. Baiqaýǵa Aqmola oblysynyń ár óńirinen jinalǵan 16-35 jas aralyǵyndaǵy 13 jyrshy-termeshi qatysyp, baq synady. Qatysýshylar biylǵy Jastar jylyna jáne Súgir jyraý Begendikulynyń 125 jyldyq mereitoiyna orai taqyryptyq baǵyttardaǵy shyǵarmalardy oryndady.
Jinalǵandar aldynda quttyqtaý sóz sóilegen Aqmola oblysy ákiminiń orynbasary Aina Mysyrálimova ulttyq tárbie men halyqtyq ónerdi nasihattaýǵa baǵyttalǵan baiqaýdyń mańyzdylyǵyna toqtaldy.
«Jyr-terme janrynyń qazaq ónerindegi orny erekshe. Elbasy Nursultan Nazarbaev «Uly dalanyń jeti qyry» maqalasynda Uly dalanyń halyq aýyz ádebieti týyndylaryn keńinen nasihattaý, jyrshylar men termeshilerdiń bai muralaryn elge tanytý, damytý kerektigin tilge tiek etti. Qany qazaq, jany qazaq adamnyń terme tyńdamaýy múmkin emes, sondyqtan Qazaqstandyqtardyń tildik mádenietin jetildirýge baǵyttalǵan osyndai sharalar arqyly taǵylymǵa toly tárbie beretin terme janryn óńirimizde damytyp, jas termeshilerdi nasihattaimyz. Terme-tolǵaý – qazynaly qazaq tarihynan syr shertip, zamana bolmysyn aiqyndap, tárbie beredi. Kezinde Mailyqoja, Shal aqyn, Imanjúsip termeleriniń el jadynda jańǵyryp, búgingi kúnge deiin saqtalýynyń syry da osynda. Qazirgi kezde termeshilik ónerdiń keń qulash jaiýyna teledidar men radio arqyly beriletin habarlardyń jáne kóptegen baiqaýlardyń ótkizilýi zor múmkindik týǵyzyp otyr. Óńirimizde jyr jáne terme ónerinde tanylyp júrgen dástúrli ánshilerimiz de óz kórermenderin qýantýda», - dedi Aina Mysyrálimova.
Bisara Mákenova, Qairat Beshimov, Názira Beisenova syndy óńirge belgili azamattardan qurylǵan qazylar alqasy termeshilerdi ánshilik sheberligine, tańdaǵan týyndysynyń mazmundylyǵyna, sahna mádenietin ustaýyna qarap baǵa berdi.
Sahna tórine birinshi bolyp shyqqan Tselinograd aýdanynyń úkilep qosqan úmiti Elbol Qýanbek «Bailaýy bekem bes ǵasyr» termesin oryndap kórermenderdi bir jelpintip tastasa, Bolatbek Orazbaevtyń «Táýelsizdik tolǵaýyn» oryndaǵan arshalylyq Nuráli Eshattyń ónerine jurt qoshemet kórsetti.
Degenmen, kileń myqtylar jinalǵan saiysta baǵy men baby qatar shapqan Aqkól aýdanynyń úkilegen úmiti Azamat Qaiyrov úshinshi oryn, Tselinograd aýdanynyń ókili Dáýren Ysqaq ekinshi oryn, al, kókshetaýlyq Álbolsyn Tańnur birinshi orynǵa laiyq dep tanyldy. Jeńimpazdar aqshalai syilyqtarmen marapattaldy.
