Túrkistan oblysynda Kóksarai sý qoimasyna batyp ketken er adamnyń múrdesi eki táýlikten keiin tabyldy, dep habarlaidy "Ult aqparat".
QR TJM resmi ókili Talǵat Ýálidiń aitýynsha, Túrkistan oblysynyń Arys qalasynan 2020 jyldyń 18 qazanynda saǵat 18-30-da sýǵa batqan adamdy izdeýge kómek suraǵan habarlama kelip túsken.
«Aldyn ala málimetterge sáikes, Baiyrqum aýyldyq okrýginde Aqqala aýylynan 20 shaqyrym jerde Kóksarai kanalynda balyq aýlaý kezinde Shymkent qalasynyń Qarataý aýdany Qainar bulaǵy shaǵyn aýdannyń turǵyny, 1982 jyly týǵan er adam jabdyqtalmaǵan jerde shomylǵan. 3 dosymen birge balyq aýlaý kezinde alkogoldi ishimdik ishkennen keiin ol sýǵa shomylamyn dep, sýǵa batyp ketken», - dedi ol.
Quramynda 6 qutqarýshy-súńgýir, 1 tehnika jáne 1 qaiyq bar Shymkent qalalyq TJ departamentiniń jedel-qutqarý jasaǵy 19 qazanda saǵat 07.00-de izdestirý jumystaryn bastady. Kóksarai arnasynyń - eni 100 m, tereńdigi 3 m, sý temperatýrasy + 8 s. Izdeý jumystarynyń nátijesinde 19 qazanda saǵat 09.04-te súńgýir Abai Oljas er adamnyń múrdesin taýyp alyp, sýdan shyǵarǵan.
Oqiǵa ornyna Túrkistan oblysy Arys qalasynyń TJ bóliminiń, aýdandyq politsiia bóliminiń qyzmetkerleri de jumyldyryldy.
