Pavlodar qalasynda kóknár tuqymyn azyq-túlik ónimi retinde kórsetip, quramynda esirtki zattary bar ónimderdi zańsyz taratqan qylmystyq topqa qatysty sot úkimi shyqty, dep habarlaidy ult.kz.
Isti Qarjylyq monitoring agenttiginiń Pavlodar oblysy boiynsha departamenti tergegen. Tergeý barysynda Z.F. Alekperovtiń quramynda esirtki zattary bar kóknár tuqymdaryn zańdy ónim retinde ótkizý shemasyn uiymdastyrǵany anyqtalǵan.
Qylmystyq áreketke onyń jaqyn týystary da qatysqan. Olardyń arasynda ónimdi jetkizý, saqtaý, býyp-túiý jáne satý mindetteri bólingen.
Tergeý málimetinshe, taýarlar basqa óńirlerden logistikalyq kompaniialar arqyly jetkizilip otyrǵan. Al satyp alýshylarǵa kóknár tuqymy men dámdeýish retinde usynylǵan.
Tintý kezinde quqyq qorǵaý organdary quramynda esirtki zattary bar kóknár tuqymdarynyń iri partiiasyn tárkiledi. Tólemder qolma-qol aqshamen de, bank aýdarymdary arqyly da qabyldanyp otyrǵan.
Sondai-aq qylmystyq jolmen tabylǵan qarajatqa uiymdastyrýshy eki avtokólik satyp alyp, olardy úshinshi tulǵalardyń atyna rásimdegeni belgili boldy.
Sot sheshimimen Alekperov pen onyń eki sybailasy 7 jyl merzimge bas bostandyǵynan aiyryldy. Qylmystyq tabysqa satyp alynǵan avtokólikter memleket kirisine tárkilendi.
Budan bólek, quramynda esirtki zattary bar 321 keli kóknár tuqymy joiyldy. Úkim zańdy kúshine endi.
