Byltyr elimizdiń túkpir-túkpirinde Respýblikalyq jəne Halyqarlyq on úsh aitys ótipti. Ókinishke orai, sol on úsh aitystyń bireýin ǵana ulttyq arnadan kórsetti. Onyń ózin «júnin julǵan taýyqtai» kúige túsirgenderin kózimen kórgender biz aitpai-aq jaqsy biletin shyǵar. Dese de, "kórsetepegennen jaqsy ǵoi" dep shúkirshilik etkenimiz de jón-aý… Al qalǵan 12 aitystyń kópshilikke kókjáshik arqyly jol tartpaýynyń mánisin biz de uqqan joqpyz, áiteýir efirden alastatylǵanǵa uqsaidy.
Naýryzdyń 12 kúni Almatyda ótken «Asqaqtai ber, Almaty» atty aitysty Almaty arnasy túsirgen bolatyn. Teledidarǵa telmirgenimizdi qaiteiik, kórsetken joq.
Shildeniń altysyndaǵy Astananyń tól merekesine orai ótken «Baǵanaly ordam - basty ordam» atty aitysty túsirgen «Habar» arnasynyń sol kezdegi direktory Rinat Dýmanuly Kertaev: «Aitysty jaqynda «Habar» arnasynan kespei, qimai tolyq kórsetetin bolamyz» degen ýádesinde turǵan joq. Ol aitys ta efirden ǵaiyp boldy.
Jeltoqsannyń 3-4 kúni Almaty qalasynda jyldyń qorytyndy «Altyn dombyra» aitysy ótti. Bul aitysty túsirýge esh telearna yqylas tanytpaǵan soń Almaty qalasy ákimshiliginiń ótinishi boiynsha «Eýraziia» telearnasy túsirip, 31 jeltoqsan men 1-2 qańtar kúnderi kórsetemiz degen bolatyn. Jarnamamen solai jar salǵanymen, qalyń qazaq taǵy da mássaǵan, «men aldandym» degendei taǵy bir sanyn soǵyp qala berdi. Eń soraqysy, bul joly beriletin aitystyń ýaqytynda aitys emes, aitystyń ornyna kógildirler kólbeńdep kontsert berdi. Bul sonda aitysty mazaq qylý ma ne?
Qytaida qazaq tilindegi habar taratatyn «Shyńjan 3» jáne «Shyńjan 8» telearnalary men «Shyńjan halyq radiosy», arǵy bettegi aǵaiyndar arasynda ótken aitystardy mindetti túrde kórsetip otyrady eken. Al óz elimizde tól ónerimizdi áspetteýdiń ornyna, telearna bitken aitys dese at tońyn ala qashady. Osynshama tól ónerden bezetindei basymyzǵa ne kún týdy?! Neni asyra siltep aityp qoiyp edik? Basqasyn aitpaǵanda «qazaqtyń qulaǵy», «ulttyń únjariiasy» dep júrgen «Qazaq radiosy» da aitystan irgesin aýlaq saldy. Byltyr aitys «IýNESKO-nyń mádeni muralar tizimine endi», - dep álemge jar saldyq. Biraq sodan aitystyń kósegesi kógergeni shamaly. Sonda búgingi tańda kógildir ekranǵa ený úshin, adam túsinbeitin sózderge jazylǵan án salyp, maqtaý men madaqtaýlar aitý kerek pe? Áitpese on úsh aitystyń bireýi ǵana jaryqqa shyǵatyndai aitys jerge qarap turǵan joq edi ǵoi. Joq álde, ólgen soń ulylary týraly aýyz toltyryp aitatyn baǵdarlama ashyp joqtaýǵa kirisetin telearnalarǵa aitys ta mindettti túrde «qaitys» bolýy kerek pe?
Shuǵaiyp Sezimhan, aitysker aqyn
