Foto: qazaly.kz
Májilis depýtaty Janarbek Áshimjan QR premer-ministri men bas prokýroryna saýal joldap, Muqaǵali Maqataevqa til tigizgen blogerdi jazalaýdy talap etti, dep habarlaidy Ult.kz.
"Uly Abaidy – krishnait, Sákendi satqyn, Mustafany qashqyn, Álihandy jóiit, Jyr alyby – Jambyldy "týfli jalaǵysh", Shámshini "araqkesh" dep, batyrlarymyzdy – baiǵus, tulǵalarymyzdy – týlaq etip jatqan mysaldar az emes. Jaqynda áleýmettik jelide bir jelókpeniń ult ustazy – Ahmet Baitursynuly babamyzdyń beinesin bas salyp toqpaqtap, judyryqtap jatqanyn kórip janymyzdan túńildik.
Al kúni keshe nadandyq pen topastyqtyń qiylysqan núktesinen búr jarǵan jas bala qazaq poeziiasynyń taýtulǵasy Muqaǵali Maqataevtyń arýaǵyna til tigizip, eldiń esin ekeý, túsin tórteý qyldy. Tulǵalardyń bári – ultqa ortaq. Taldap, tarazylap jatpaiyn, bul keleńsiz oqiǵa búkil qoǵamnyń janyn túrshiktirdi", - deidi depýtat.
Onyń sózinshe, tiisti quzyrly oryndar men jaýapty memlekettik organdar tarapynan mundai qadamdarǵa tiisti quqyqtyq baǵasy ýaqytyly berilmegen jerde túrli áleýmettik toptar óz betinshe jazalaý sharasyna kóshedi.
Áleýmettik jelilerde tarihi tulǵalarǵa ǵana emes, til men dinge, ulttyń namysyna, eńbek qatynasyndaǵy ádiletsizdikterge bailanysty "jazalaý" sharalary az emes, deidi ol.
"Muqaǵaliǵa qatysty jaǵdaida da ashýǵa býlyǵyp, sharasyzdyqqa ushyraǵan azamattar sondai qadamǵa bardy. Jeke akkaýntynda adam jinap ataqqa shyǵam degen balany áke-sheshesimen aqynnyń týǵan jerine alyp baryp, keshirim suratty. Janushyrǵan qart kisiniń taý baýraiyn jańǵyrtqan janaiqaiynyń túp tamyry qaida jatyr? Namystan jaryla jazdaǵan jurttyń bul qadamyn qoǵam ártúrli qabyldady, árine. Jastyqta kókirek – zor, ýaiym – joq.
Kárisi kimniń joq bolsa, jasy bolar dýana. Alaida, rýhani turǵyda kez kelgen keri áreketke tiisti ýákiletti organdar tarapynan jaýap berilmegen jerde osyndai jaǵdailar oryn alady. El Prezidentiniń sát saiyn "qoǵamda Zań ústemdigi jáne tártip saltanat qurý kerek!" degen sóziniń túp maǵynasy osy emes pe, aǵaiyn!", - deidi Janarbek Áshimjan.
Osylai degen depýtat Úkimet ultymyzdyń uly tulǵalaryna til tigizýge, qorlaýǵa jol bermeitin sharalardy zańdyq turǵydan qolǵa alýy kerek dep sanaitynyn aitqan.
"El maqtanyshtarynyń ar-namysyn aiaqqa taptaǵandar Zań aldynda jaýap berip, tiisti jazasyn alǵan jaǵdaida ǵana ulttyq qundylyqtarymyzdy qasterlei alamyz. Bul rette, Májilis depýtattary qoldanystaǵy zańnamaǵa tiisti ózgertýler engizý jaǵynan qoldaý kórsetýge daiyn", - dep saýalyn joldady ol.
