Memlekettik hatshy Qoǵamdyq sanany jańǵyrtý baǵdarlamasyn iske asyrý jónindegi Ulttyq komissiianyń otyrysyn ótkizdi, dep habarlaidy "Ult aqparat" Aqordaǵa silteme jasap.
Qyrymbek Kósherbaevtyń tóraǵalyǵymen Qazaqstan Respýblikasy Prezidentiniń janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komissiianyń otyrysy ótti. Beinebailanys formatynda ótken otyrysta baǵdarlamany iske asyrýdyń aǵymdaǵy qorytyndylary talqylanyp, odan ári atqarylatyn jumystyń basym baǵyttary aiqyndaldy.
Qyrymbek Kósherbaev otyrysty asha kele, Memleket basshysy Qasym-Jomart Toqaev «Táýelsizdik bárinen qymbat» baǵdarlamalyq maqalasynda Tuńǵysh Prezident – Elbasy Nursultan Nazarbaev bastamashy bolǵan «Rýhani jańǵyrý» baǵdarlamasyn odan ári damytýdyń qundy baǵdarlaryn aiqyndaǵanyn atap ótti. Birinshiden, Táýelsizdigimizdiń qasterli qundylyqtaryn qorǵaý men qasterleý, ekinshiden, qoǵamdyq damýdyń ózekti máseleleri boiynsha naqty memlekettik ustanym ekenin aitty.
Memlekettik hatshy jahandanýdyń zamanaýi syn-qaterleri men tegeýrinderi jaǵdaiynda «Rýhani jańǵyrý» baǵdarlamasy adam kapitalyn damytýdyń basty baǵdary ári qoǵam úshin jańa ideologiialyq kún tártibin qalyptastyrýdyń tetigi ekenin jetkizdi.
Premer-Ministrdiń orynbasary Eraly Toǵjanovtyń aitýynsha, 2020 jyly «Rýhani jańǵyrý» baǵdarlamasynyń Is-sharalar josparyn júzege asyrý aiasynda 8 millionnan astam adam qamtylǵan 30 000 is-shara ótkizilgen. Baǵdarlamany iske asyrýdyń jańa qundy tásilderi men tetikteri sharalardyń aiasyn úsh negizgi baǵyt boiynsha keńeitýge múmkindik berdi. Atap aitqanda: «Tulǵalyq damý», «Ulttyq biregeilik jáne halyqaralyq mártebeni arttyrý», «Memlekettiń, azamattyq qoǵamnyń jáne jergilikti qoǵamdastyqtardyń damýy». Sonymen qatar arnaiy 4 jańa joba engizildi. Olar: «Únem – qoǵam qýaty», «Dástúr men ǵuryp», «Quqyqtyq mádeniet» jáne «Eńbek – eldiń muraty».
«Týǵan jer» arnaiy jobasynyń aiasynda ótken jyly otandyq metsenattar negizgi aimaqtyq infraqurylymdyq obektilerdi damytýǵa 10 mlrd teńge kóleminde qarjy bólip, áleýmettik mańyzy bar 537 nysan salyp, 445 nysanǵa jóndeý jumystaryn júrgizdi.
Otyrysqa qatysýshylarǵa Qoǵamdyq sanany jańǵyrtý baǵdarlamasyn iske asyrýdyń arnaiy Jol kartasy usynyldy.
Jiynda talqylanǵan máseleler boiynsha belgili ǵalym, tarih ǵylymdarynyń doktory, professor Talas Omarbekov, «Ulttyq kinony qoldaý memlekettik ortalyǵy» KEAQ Basqarma tóraǵasy Esetjan Qosýbaev, Shyǵys Qazaqstan oblysy Borodýliha aýdanynyń metsenaty Konstantin Pop, QR Prezidentiniń «Bolashaq» halyqaralyq stipendiiasy stipendiattary qaýymdastyǵynyń atqarýshy direktory Laýra Demesinova sóz sóiledi.
Otyrys qorytyndysy boiynsha Úkimetke «Rýhani jańǵyrý» baǵdarlamasynyń 2021 jylǵa arnalǵan Jol kartasyn sapaly ári tiimdi iske asyrýdy qamtamasyz etý boiynsha birqatar tapsyrma berildi.
Memlekettik hatshy Ulttyq komissiianyń usynystary men usynymdaryn qarastyrýdy tapsyrdy. Atap aitqanda, Qazaqstannyń tolyq akademiialyq tarihyn jazý úshin «Halyq tarihy» atty jobalyq keńseni ashý, «Kinodaǵy jáne teledidardaǵy tarih» atty arnaiy jobanyń taqyryptaryn kúsheitý, «Kieli Qazaqstan» arnaiy jobasy aiasynda týrizmdi damytý, otandyq Sailaýshylar bankin qalyptastyrý. Ásirese balalar men jasóspirimder úshin sapaly mádeni-aǵartýshylyq jáne bilim berý kontentin qalyptastyrý qajettiligine nazar aýdaryldy.
