26 qazanda Aqordada QR Prezidenti Ákimshiliginiń Basshysy Áset Isekeshevtiń tóraǵalyǵymen Qazaqstan Respýblikasy Prezidentiniń janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komissiianyń kezekti otyrysy ótti.
Keńestiń jumys kún tártibi «Rýhani jańǵyrý» baǵdarlamasyn iske asyrýdyń jáne Baǵdarlamany basqarý ofisiniń qyzmetin uiymdastyrýdyń nátijelerin talqylaýǵa arnaldy.
Ulttyq komissiianyń tóraǵasy otyrysty asha otyryp, «Rýhani jańǵyrý» baǵdarlamasynyń Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynyń negizgi baǵyttaryn iske asyrý aiasyndaǵy erekshe mańyzyn atap ótti.
QR Prezidenti Ákimshiliginiń Basshysy «Rýhani jańǵyrý» baǵdarlamasynyń oryndalýyn jańa mazmunmen jáne baǵyttarmen toltyrýdyń mańyzdylyǵyn atap ótti.
«Memleket basshysynyń tapsyrmasyna sáikes, taiaý ýaqytta jańa «Aýyl – el besigi» jáne «Óz jerińdi tanyp bil» jobalary iske qosylatyn bolady, olar aýyldyq aýmaqtardyń damýyna qosymsha serpin bermek», - dep atap ótti Á.Isekeshev.
Komissiia otyrysynda sondai-aq O.Orazalin, A.Balaeva, D.Abaev, A.Evniev, D.Kaletaev, A.Muhamediuly jáne R.Kenjehanuly sóz sóiledi.
Beinebailanys rejiminde Jambyl jáne Batys Qazaqstan oblystarynyń ákimderi tyńdaldy.
Talqylaýlar qorytyndysy boiynsha Ulttyq komissiianyń tóraǵasy Úkimetke 2018-2019 jyldarǵa arnalǵan «Rýhani jańǵyrý» baǵdarlamasyn iske asyrý jónindegi biryńǵai jospar ázirleýdi, Aýyl sharýashylyǵy ministrligine jańa «Aýyl – el besigi» áleýmettik jobasyn iske qosýdy tapsyrdy.
Óńirler basshylaryna jergilikti jerlerde Baǵdarlamanyń tapsyrmalaryn barlyq basymdyq baǵyttary boiynsha naqty maqsattar men nátijelerge qol jetkizýge kóńil bóle otyryp iske asyrý jóninde tapsyrmalar berildi.
Aita ketsek, Ulttyq komissiia Qazaqstan Respýblikasy Prezidentiniń Jarlyǵymen qoǵamdyq sanany jańǵyrtý baǵdarlamasyn iske asyrý, eldiń odan ári ilgerilemeli mádeni-gýmanitarlyq damýyn qamtamasyz etý maqsatynda qurylǵan.
Komissiia quramyna tanymal qoǵam qairatkerleri, ǵalymdar, jazýshylar, jýrnalister, Parlament depýtattary, Prezident Ákimshiliginiń ókilderi, Úkimet músheleri, óńirlerdiń, Astana, Almaty jáne Shymkent qalalarynyń ákimderi, Qazaqstan halqy Assambleiasynyń músheleri, saiasi partiialar ókilderi kiredi.
