Aqparat jáne qoǵamdyq damý vitse-ministri Bolat Tilepov qoǵamdyq keńes jónindegi zańǵa naqty qandai ózgerister men tolyqtyrýlar engizilgenin aityp berdi, dep habarlaidy QazAqparat.
«2021 jylǵy 3 qańtarda Memleket basshysy «QR keibir zańnamalyq aktilerine qoǵamdyq keńesterdiń qyzmeti máseleleri jóninde ózgerister men tolyqtyrýlar engizý týraly» zańǵa qol qoidy. Jalpy qoldanystaǵy qoǵamdyq keńester týraly zańnyń ózi 2015 jyly qabyldanǵan bolatyn. Ýaqyt kórsetkendei, bul qujat ta, jalpy qoǵamdyq keńester institýty óz ózin aqtady desek te bolady», - dedi Bolat Tilepov OKQ-da ótken baspasóz máslihatynda.
Vitse-ministrdiń aitýynsha, atalmyz zańdy usynylyp otyrǵan ózgertýler tek olardyń qyzmetin odan ary jetildirýdi kózdep otyr.
«Atap aita keterligi, qoldanystaǵy zańǵa uzyn sany 40 jańa norma men túzetilgen 28 norma engizilip otyr. Sondyqtan birden eń mańyzdy máselelerge toqtalaiyn. Birinshiden, qoǵamdyq keńesterdiń quramyn jasaqtaýda basty talap – derbes jáne táýelsiz qyzmet etý. Sol sebepti jumys tobynyń basshysyn azamattyq qoǵam ókilderi qatarynan sailaý usynyldy. Bul usynysty biz keńester quramyn irikteý isinde ákimshilik resýrstardyń yqpalyn azaitý maqsatynda qabyldadyq. Jańa zańnama kandidattar esebinen rezervtik tizim jasaýǵa jáne keńes quramynan shyqqandardyń ornyna osy tizimnen jańa múshelerdi sailaýǵa múmkindik beredi», - dedi ol.
Bolat Tilepov keńester quramyn ýaqtyly tolyqtyryp otyrýǵa qatysty syn buǵan deiin kóp aitylyp kelgenin aityp ótti.
Sondyqtan jańa norma bul máseleni tiimdi jolmen retteýge baǵyttalǵan.
«Qoldanystaǵy zańda qoǵamdyq keńes músheleriniń sanynyń naqty mólsheri qarastyrylmaǵan bolatyn. Bul rette keńes músheleriniń sany ortalyq deńgeide 15-30 adam aralyǵynda, al jergilikti deńgeide halyq sanyna bailanysty anyqtaý usynylyp otyr. Basty talap – keńes quramyna túrli áleýmettik toptardyń ókilderin tartý qajet. Osyǵan orai ókiletti organ keńestiń sany men sapalyq quramy boiynsha usynym ázirleidi. Sonymen birge zań qoǵamdyq keńes jumysyna qatyspaityn keńes músheleriniń ókilettigin toqtatý tártibin retteitin normalarmen tolyqtyrylyp otyr», - dedi ol.
