Búgin Májilistiń jalpy otyrysynda «Qazaqstan Respýblikasynyń keibir zańnamalyq aktilerine qoǵamdyq keńesterdiń qyzmeti máseleleri boiynsha ózgerister men tolyqtyrýlar engizý týraly» QR zańynyń jobasy birinshi oqylymda maquldandy, dep habarlaidy QazAqparat.
Atalǵan zań jobasy boiynsha negizgi baiandama jasaǵan QR Aqparat jəne qoǵamdyq damý ministri Aida Balaevanyń aitýynsha, jalpy qoǵamdyq keńester týraly zańnyń ózi Elbasynyń tapsyrmasymen 2015 jyly qabyldanyp, qoldanysqa engizilgen.
«Ýaqyt kórsetkendei, qujat ta, qoǵamdyq keńester institýty da ózin ózi aqtady. Búgingi usynylyp otyrǵan túzetýler tek olardyń qyzmetin odan ary jetildirýdi kózdeidi. Qoldanystaǵy zańǵa 40 jańa norma jáne 28 ózgeris engizý usynylady. Birinshi - qoǵamdyq keńesterdiń quramyn jasaqtaý. Bul jerdegi basty talap - derbes jáne táýelsiz qyzmet etý. Sondyqtan jumys tobynyń basshysyn azamattyq qoǵam ókilderi qatarynan taǵaiyndaý usynalady. Zań jobasy kandidattar esebinen rezervtik tizim jasaý, keńes quramynan shyqqandardyń ornyna rezervtik tizimnen jańa músheler sailaý úshin qosymsha konkýrs jariialaýǵa múmkindik beredi. Keńester quramyn ýaqytyly tolyqtyryp otyrý máselesi buǵan deiin kóp aitylatyn. Bizdiń oiymyzsha, jańa norma bul máseleni tiimdi jolmen retteitin bolady», - dedi ministr.
Onyń aitýynsha, ekinshiden qoǵamdyq keńesterdiń ókilettigin kóterý kózdeledi. Zań jobasy qoǵamdyq keńesterge ótinishter men normativtik-quqyqtyq aktiler jobasyn olardyń qoǵamdyq mańyzdylyǵyna qarai ózderi iriktep qaraýǵa quqyq beredi. Sondai-aq qoǵamdyq keńesterge jergilikti deńgeidegi quqyq qorǵaý organdary basshylarynyń esebin tyńdaýǵa ókilettik beretin norma engiziledi.
«Taǵy bir toqtala ketetin mańyzdy ózgeris - Memleket basshysynyń tapsyrmasy boiynsha memlekettik jáne kvazimemlekettik sektordyń satyp alý konkýrstyq komissiialaryna qoǵamdyq keńes múshelerin qatystyrýǵa ókilettik beretin tolyqtyrý bar. Úshinshi - qoǵamdyq baqylaýdy júrgizý protsedýrasyn retteý. Bul buryn zańmen aiqyndalǵan qoǵamdyq baqylaýdyń barlyq 4 formasyn qamtidy. Atap aitqanda, qoǵamdyq talqylaýlar, qoǵamdyq saraptama, qoǵamdyq monitoring jáne memlekettik organ jetekshileriniń esebi. Ol úshin ókiletti organ osy rásimdi uiymdastyrý jáne ótkizý erejelerin ázirleidi», - dedi ol.
Ministr tórtinshiden qoǵamdyq keńesterdyń qyzmetin uiymdastyrý qamtamasyz etiletindigin aitady. Iaǵni, budan bylai jergilikti deńgeilerde uiymdastyrý jumystary máslihattarǵa júkteledi.
«Ózderińizge málim, bul mindet buǵan deiin jergilikti ákimdikterde bolatyn. Alaida qoǵamdyq keńesterdiń bastamasy boiynsha jáne depýtattardyń qoldaýynan keiin zań jobasyna tiisti ózgertýler engizildi. Besinshi - qoǵamdyq keńester salasynda ókiletti organdy anyqtaý. Bul oraida ókiletti organ retinde Aqparat jáne qoǵamdyq damý ministrligi usynylady. Onyń basty mindeti - keńester qyzmetin úilestirý jáne ádistemelik kómek berý. Sondai-aq Memleket basshysyna qoǵamdyq keńester qyzmeti týraly jyl saiyn ulttyq baiandama jasalady. Altynshy - kvazimemlekettik sektorda qoǵamdyq keńester qurý. Memleket basshysynyń Joldaýynda berilgen tapsyrmalar negizinde kvazimemlekettik sektorda, atap aitqanda ulttyq kompaniialarda, últtyq holdingterde, ulttyq basqarý holdingterinde qoǵamdyq keńester qurý jónindegi tolyqtyrýlar engizildi», - dedi Aida Balaeva.
