Qoǵamdyq keńester ataýynan «janyndaǵy» qosymsha sózdi alyp tastaý kerek. Bul týraly búgin «Nur Otan» partiiasy janyndaǵy Quqyqtyq keńes tóraǵasy Nurlan Ábdirov aitty, dep habarlaidy QazAqparat.
«Qoǵamdyq keńester «janyndaǵy» bolmaýy tiis. Búginda aýmaqtyq barlyq qoǵamdyq keńester durys atalady. Olar - oblystyń, aýdannyń, Almaty, Nur-Sultan qalasynyń qoǵamdyq keńesteri», - dedi Nurlan Ábdirov atalǵan keńestiń keńeitilgen otyrysynda.
Osy rette ol durys atamaýdyń úlgisi retinde Densaýlyq saqtaý ministrliginiń qoǵamdyq keńesin mysalǵa keltirdi.
«Eger qoǵamdyq keńes ataýynda Densaýlyq saqtaý ministrligi kórsetilse, onda bul durys emes. Ol ministrliktiń qoǵamdyq keńesi bola almaidy. Atalǵan zań jobasymen jumys istegen bastapqy kezeńde-aq biz qoǵamdyq keńester qandai da bir memlekettik organnyń janyndaǵy, ákimdiktiń, ministrliktiń janyndaǵy bolmaýy tiistigimen kúresken edik. Ol aýmaqtyń qoǵamdyq keńesi nemese qandai da bir baǵyttyń qoǵamdyq keńesi bolýy tiis. Aitalyq, Ishki ister ministrliginde IIM janyndaǵy qoǵamdyq keńes emes, ishki ister organdarynyń qyzmet máseleleri jónindegi qoǵamdyq keńes bolýy qajet», - dedi N.Ábdirov.
Aita keteiik, sharaǵa qoǵamdyq keńesterdiń, sarapshylyq qoǵamdastyqtardyń, ÚEU-lerdiń músheleri, memlekettik organdar men halyqaralyq uiymdardyń basshylary qatysty.
Búginde elimizde túrli deńgeidegi 234 qoǵamdyq keńes jumys isteidi.
