Almatyda Qoǵamdyq keńes músheleri politsiia jumysynyń kemshilikterin talqylai otyryp, qazaqstandyqtarǵa qylmyskerlerden qorǵaný úshin qysqa oqpandy qarý ustaýǵa ruqsat etýdi usyndy.
"IIM qaýipsizdigimizdi qamatamyz ete almaityn bolsa, litsenziia-ruqsat berý júiesin rettep, azamattarǵa qysqa oqpandy qarý satyp alýǵa jáne ustaýǵa ruqsat beretin zań qabyldaýdy qoldaimyn. Eń bolmasa, travmatikalyq qarý qaitarylsyn. Mysaly, birneshe jyl buryn bizden travmatikalyq qarýdy alyp qoidy. Statistikaǵa qarańyzdarshy. Qylmyskerler atys shyǵarýdy toqtatqan joq. Al jábirlenýshilerdiń birinde travmatikalyq qarý bolǵanda qaiter edi? Bizdi, zańǵa baǵynatyn azamattardy óz-ózin, múlki men jaqyndaryn qorǵaýdyń zańdy tásilinen nege aiyrady?" — dedi Qoǵamdyq keńes múshesi Erlan Smailov.
"Politsiia bizdi qorǵai almaityn bolsa, adamdardy qarýlandyrý ideiasyn tolyqqandy qoldaimyn. Halyqqa travmatikalyq qarýdy qaitaraiyq. Iir oiyqty myltyq nemese revolver bolmasa da, travmatikalyq qarýdy qaitarsyn. Politsiiada reforam júrgizilip bitkenshe, paidalanýǵa bersin", — dedi tanymal jýrnalist ári qoǵam qairatkeri Sergei Ponomarev.
Budan bólek, onyń aitýynsha, politsiia jumysyn reformalaýdy naqty isten bastaý kerek ári quqyq qorǵaýshylar ǵimaratty qorshaǵan dýaldy alyp tastap, halyqpen jaqyndasa túsýi kerek.
"Eki jyl buryn Kúlekbaev (2016 jyly Almatyda terakt jasaǵany úshin ómir boiyna sottalǵan Rýslan Kúlekbaev) búkil Almatyny tize búktirdi. Áli eńsemizdi kótergen joqpyz. Qorǵaýshylarymyz bizden tasalanyp alǵan. Endi AIIB men IID esikterin aiqara ashý kerek. Shuǵyl arada. Adamdar kelip, eki saǵat kezekte otyrady da: "Ái, qurysynshy sol!", — dep qoldy bir silteidi. Mine, sol sebepti tirkelgen qylmystyń sany 30%-ǵa qysqarady. Al aqyryna deiin otyryp, aryz bergender uzaq kútedi. 10%-y ǵana bir nátijege qol jetkizedi", — deidi Ponomarev.
Búgin Almatynyń Qoǵamdyq keńesiniń qalalyq politsiia jumysyndaǵy problemalar taqyrybynda ótken otyrysynyń qorytyndysy boiynsha, onyń músheleri Almaty ishki ister departamenti basshysy Serik Kúdebaev pen ishki ister ministri Qalmuhanbet Qasymovty qyzmetinen bosatý máselesin el basshylyǵy aldyna qoiýǵa biraýyzdan sheshim qabyldady.
Esterińizge sala ketsek, 19 shilde kúni Almaty ortalyǵynda tanymal mánerlep syrǵanaýshy Denis Ten kisi qolynan qaza tapqannan keiin, ózin-ózi qorǵaý máselesi Qazaqstanda qyzý talqylana bastady. 25 jastaǵy sportshyny kólik urylary pyshaqtap ketken.
