Elimizde Qoǵamdyq keńesterdiń qyzmeti týraly Ulttyq baiandama daiyndalady. Bul týraly QR Aqparat jáne qoǵamdyq damý vitse-ministri Daniiar Qadyrov málim etti, dep habarlaidy QazAqparat.
«Bizdi aýqymdy is kútip tur. Prezident, Parlament, saiasi partiialar, sot jáne quqyq qorǵaý organdarynyń negizgi quzyreti qaita qaralady. Bizdi sýperprezidenttik basqarý formasynan Parlamenti myqty prezidenttik respýblikaǵa ótý kútip tur. Bizdiń ministrlikke kelsek, Qoǵamdyq keńestiń quramyn jańartyp, ministrliktiń qyzmetin jetildire túsý jumysy jalǵasyn tabady. Qazirgi tańda elimizde 102 keńes quryldy. Odan bólek, taǵy 111 keńes qurý qaralyp jatyr. Jańa keńesterdi qurýda úkimettik emes uiym, partiia jáne azamattyq institýttardyń ókilderi keńinen tartylýda. Biyl alǵash ret Qazaqstanda qoǵamdyq keńes qyzmeti týraly Ulttyq baiandama ázirlenedi», - dedi Daniiar Qadyrov.
Vitse-ministrdiń aitýynsha, Qoǵamdyq keńesterdiń jumysyna taldaý jasalyp, onyń bolashaq damýy zerdelenbek.
«Sonymen qatar úkimettik emes uiymdardyń jobalaryn josparlaýdy memlekettik tapsyrys júiesi arqyly júzege asyrý qaralady. Keleli máselelerdi sheshýde quzyrly organdarmen birge qoǵam belsendileri tartylady. Ár sheshim boiynsha tiianaqty taldaý jasalady. Odan bólek, Parlament qabyrǵasynda qoǵamdyq baqylaý týraly zańnama talqylanyp jatyr. Ol zań memleket pen azamattar arasynda jańa printsipti qalyptastyrýǵa múmkindik beredi», - deidi ol.
Aita ketsek, osy ýaqyta Qazaqstandyq qoǵamdyq damý institýty janyndaǵy «Sarap» sarapshylyq klýby alańynda «Jańa Qazaqstan» úshin saiasi reformalardyń jańa baǵdarlamasy» atty dóńgelek ústel otyrysy ótip jatyr.
Atalǵan sharaǵa Parlament Májilisiniń depýtattary, saiasattanýshylar, qoǵam qairatkerleri men sarapshylar qatysýda.
