QR Qoǵamdyq damý ministri Darxan Káletaev qoǵamdyq keńesterdiń jumysyn kúsheitýge qatysty usynystardy jariialady. Olardy arnaiy zań jobasyna engizý josparlanǵan, dep xabarlaidy QazAqparat tilshisi.
Ministrdiń aitýynsha, qoǵamdyq keńeske múshe azamattardyń belsendiligin arttyrý úshin motivatsiia bolýy qajet. Sonyń ishinde aqshalai stimýldy da qoldanýǵa bolady.
«Qoǵamdyq keńes músheleriniń arnaiy reitingin engizý usynylyp otyr. Sonda árbir másele, petitsiia, qoǵamdyq tyńdaý úshin úkimettik emes uiymdarǵa nemese jeke tulǵalarǵa upai beriledi. Osy jumystyń nátijesinde úkimettik emes uiymǵa syiaqy beriledi. Ol úshin memlekettik-áleýmettik tapsyrys, granttar men syiaqylar týraly zańnamaǵa ózgerister engiziledi», - dedi D.Káletaev qoǵamdyq keńesterdiń II respýblikalyq májilisinde.
Onyń sózine qaraǵanda, qoǵamdyq keńes otyrystaryna qatysý erejesin de kúsheitý kózdelgen. Máselen, keńes múshesi úsh otyrysqa kelmese, ony keńes quramynan birden shyǵaryp tastaidy.
«Ondai azamat basqa keńesterge de múshe bola almaidy. Al quziretti memlekettik organ «qara tizimdi» júrgizedi. Transformatsiianyń nátijesinde ortalyq memlekettik organdardaǵy keńester - 35 protsentke, al oblys deńgeiindegi qoǵamdyq keńester 25 protsentke keńeiedi degen boljam bar. Qalalyq jáne aýdandyq keńester shamamen 20 protsentke ońtailandyrylady. Sonda qoǵamdyq keńesterdiń tiimdiligi artady. Qazir «Qoǵamdyq keńes týraly» zań jobasy ázirlenip jatyr. Aǵymdaǵy jyly maýsym aiynda atalǵan qujat Parlament Májilisine engiziledi», - dep atap kórsetti D.Káletaev.
