Qoǵamdyq keńester jónindegi zańnamany jetildirý aiasynda qoǵamdyq keńesterdegi memlekettik organdardyń qatysýyn 10 paiyzǵa deiin qysqartý usynylýda. Bul týraly Qoǵamdyq damý vitse-ministri Abzal Núkenov Parij qalasynda (Frantsiia) ótken Ekonomikalyq yntymaqtastyq jáne damý uiymy (EYDU) Sybailas jemqorlyqqa qarsy júiesiniń plenarlyq otyrysynda habarlady.
Vitse-ministr Abzal Núkenov óz sózinde qoǵamdyq keńesterdi jetildirý boiynsha qabyldanyp jatqan is-sharalar týraly baiandady. Ol qoǵamdyq keńester jónindegi zań jobasy tujyrymdamasynyń jobasy ázirlenip, QR Ádilet ministrligine engizilgenin atady. Ózgerister qoǵamdyq keńes múshelerin qalyptastyrý, rotatsiialaý, ókilettikterin toqtatý mehanizmderi jáne keńes qyzmetin qarjylai, materialdyq-tehnikalyq qamtamasyz etý máselelerine qatysty bolady.
Sonymen qatar, qoǵamdyq keńesterge memlekettik organdardyń qatysýyn 10 paiyzǵa deiin qysqartý usynylýda. Qoldanystaǵy zańnamaǵa sáikes memlekettik organdardyń qoǵamdyq keńesterge qatysýy músheleriniń jalpy sanynyń úshten bir bóliginen aspaýy tiis.
EYDU sarapshylary óz kezeginde, Qazaqstanda qoǵamdyq keńesterdi jetildirý boiynsha qabyldanyp jatqan is-sharalarǵa oń baǵa berdi.
Sarapshylardyń pikirinshe, bul ózgeris qoǵamdyq keńesterdiń maqsaty men mindetterine qatysty qoǵamnyń oń pikirin qalyptastyrady. Sonymen qatar, memlekettik organdar men turǵyndar arasyndaǵy suhbat alańy retinde qoǵamnyń senimin arttyrady.
EYDQ otyrysynyń negizgi maqsaty – sybailas-jemqorlyqqa qarsy Stambýldyq is-qimyl josparyn taldaýdyń 4-shi kezeńi aiasynda Armeniia, Qyrǵyzstan jáne Ýkrainanyń taldaý esebin, sonymen qosa Ázirbaijan, Qazaqstan, Grýziia, Monǵoliia, Tájikstan, Ýkraina jáne Ózbekstan boiynsha aralyq esepterdi talqylaý jáne bekitý.
.jpeg)