Qoǵamdaǵy turaqtylyq pen tynyshtyq politsiianyń minsiz qyzmetine bailanysty. Bul týraly «BIZ BIRGEMIZ» onlain forýmda Qazaqstan Prezidenti Qasym-Jomart Toqaev aitty, dep habarlaidy QazAqparat.
«Men quqyq qorǵaý organdarynyń da eńbegin erekshe atap ótkim keledi. Eldegi tártip saqshylaryna asa mańyzdy mindet júktelip otyr. Qoǵamdaǵy turaqtylyq pen tynyshtyq politsiianyń minsiz qyzmetine bailanysty. Sizder kúrdeli tótenshe jaǵdai kezeńinen abyroimen óttińizder. Búginde karantin sharalarynyń saqtalýyn qadalaǵap, beketterde qyzmet etip kelesizder. Bul ońai jumys emes. Tipti qoǵam ókilderi tarapynan synǵa ushyraǵan kezderińiz de boldy. Árine, kásibi turǵydan biliksizdik tanytqan politsiia qyzmetkerleri de joq emes. Osyndai jekelegen jaǵdaidar búkil quqyq qorǵaý organdarynyń bedeline ziian keltiredi. Degenmen, tártip saqshylarynyń basym bóligi adal qyzmet etip jatqan azamattar. Muny eshkim joqqa shyǵara almaidy», - dedi Qazaqstan Prezidenti.
Osy rette Memleket basshysy ishki ister organdarynyń barlyq qyzmetkerlerin kásibi merekeleri - Politsiia kúnimen shyn júrekten quttyqtady. Memlekettik qyzmetshilerdiń jáne aq halatty abzal jandardyń da tól merekesi qutty bolsyn degen tilegin jetkizdi.
«Otan aldyndaǵy sertke berik bolǵandaryńyz úshin barshańyzǵa alǵys aitamyn. Sondai-aq áskeri qyzmetkerler, eriktiler, memlekettik qyzmetshiler, qaiyrymdylyq uiymdardyń ókilderi, jýrnalister jáne basqa da belsendi azamattarymyz zor qurmetke laiyq. Sizderdiń arqalaryńyzda koronavirýspen kúrestiń kúrdeli kezeńderin eńserip kelemiz. Barshaǵyzdy beibit kúnniń batyrlar deýge bolady. Biz ózderińizdi maqtan tutamyz. Qajyrly eńbekterińiz úshin rizashylyǵymdy bildiremin», - dedi Qasym-Jomart Toqaev.
