Qoǵamda konstitýtsiialyq ózgeristerge joǵary qyzyǵýshylyq baiqalady. Bul týraly QR Memlekettik hatshysy Erlan Qarin aitty, dep habarlaidy QazAqparat.
«Búgin - referendým-2022 úgit naýqanynyń sońǵy kúni. Erteń tynyshtyq, al odan arǵy kún konstitýtsiialyq reformalarǵa daýys berý kúni. Úgit naýqany óte belsendi, qarqyndy júrgenin atap ótkim keledi. Qoǵamda konstitýtsiialyq ózgeristerge, jalpy saiasi reformalarǵa barynsha joǵary qyzyǵýshylyq baiqalady. Ulttyq keńestegi áriptesterimmen birge konstitýtsiialyq reformalardy túsindirýge qatystyq. Atap aitqanda, Qyzylorda, Soltústik Qazaqstan oblystary, Almaty qalasy syndy óńirlerge bardyq. Ol jerlerde óńirlik qoǵamdyq keńestermen, shyǵarmashylyq jáne ǵylymi ziiatkerlermen, jastarmen túrli formatta kezdesý ótkizdik. Jasyna, isteitin qyzmetine, turǵylyqty jerine qaramastan qazaqstandyqtar eldegi oryn alyp jatqan ózgeristerge úlken nazar aýdaratyndyǵyn atap ótken jón. Jáne de azamattardyń basym bóligi prezidenttik saiasi jańǵyrý baǵdarlamasyn, jalpy Konstitýtsiiadaǵy ózgeristerdi qoldaidy», dep jazdy Erlan Qarin Telegram paraqshasynda.
Sonymen qatar ol Ulttyq qoǵamdyq senim keńesiniń múshelerimen birge konstitýtsiialyq reformalardyýń negizgi erejelerin túrli sarapshylyq alańdarda, BAQ betinde talqyǵa salǵandaryn atap ótedi. Mysal retinde, A.Baitasov pen M.Ábenovtiń YouTube-arnalaryn alǵa tartady.
«Áleýmettik jelilerde ádistemelik kómek retinde Konstitýtsiiadaǵy túzetýlerdiń negizgi baǵyttaryn túsindirýge arnalǵan eki rolik jariialandy. Kópshilik atap ótkendei, úgit jappai myńdaǵan «alǵa-forýmsyz» ótti. Barlyq naýqan qoǵamdyq suhbat, áńgimelesý jáne talqylaý formatynda boldy. Bul Jańa Qazaqstannyń jańa saiasi mádenietin qalyptastyrýdaǵy alǵashqy qadam», - dedi Memlekettik hatshy.
