Memlekettik tapsyrystar men granttar qoǵamda qalyptasqan máselelerdi sheshýge baǵyttalǵan jumystardy qarylandyrýy kerek. Bul týraly óziniń Facebook-paraqshasynda QR Aqparat jáne qoǵamdyq damý ministri Aida Balaeva málim etti, dep habarlaidy "Ult aqparat".
«Azamattyq qoǵam institýttaryn kópten beri mazalap júrgen suraqtardyń biri - memleket tapsyrys beretin áleýmettik mańyzy bar jobalardyń tizimin qurý máselesi. Olar rasynda mańyzdy ma? Tiimdiligi qandai? Qoǵam men naqty adamǵa bereri ne? Eń bastysy - qandai áleýmettik máseleni sheshýde? Jasyratyny joq, is júzinde kóp jobalardyń máni mańyzyna, bastamasy nátijesine sáikes kelmei jatady. Óz basym bul jaǵdaidy túbirimen ózgertip, barlyq jobalardy ashyq talqylaityn ýaqyt keldi dep esepteimin. Óitkeni, memleket azamattyq qoǵam institýttaryn áriptes dep biledi ári senedi», - dep jazdy ministr.
Osy rette ol óziniń usynysy boiynsha kun.kz ashyq media-alańynda búginnen bastap Qazaqstannyń Azamattyq aliansymen birlese otyryp, «Qoǵamdyq saraptama» jobasy jumysyn bastaǵanyǵyn jetkizdi. Onyń basty maqsaty - úkimettik emes uiym ókilderinen usynystar jinap, árbir túsken bastamanyń tiimdiligine saraptama jasap, kásibi baǵa berý.
«Taǵy da atap ótkim keledi, memlekettik tapsyrys pen granttar bólýdiń maqsaty tek qoǵamdyq uiymdardy qoldaý ǵana emes, eń aldymen, qoǵamnyń qajetin sheshetin isterdi qarjylandyrý. Árbirden soń bul barshamyzdyń ortaq múddemiz. Sóz joq, osyny túsinip, barynsha qoldaý kórsetip jatqan uiymdardyń kóptigi qýantady. Siz bolyp, biz bolyp bul mindetti de atqaramyz dep senemin», - dedi Aida Balaeva.
