Foto: Ashyq derekkózden
Nurai Serikbaidyń aǵasy sot ádil ótetinine kúmánmen qarap, sottyń ashyq túrde onlain ótýin talap etip otyr. Onyń maqsaty - qoǵamnyń qoldaýyna ie bolý, dep habarlaidy Ult.kz.Májilis depýtaty Murat Ábenov Shymkentte kisi qolynan qaza tapqan Nurai Serikbaidyń aǵasy Sultan Serikbaimen birge video túsirip, beinematerialyn Ult.kz tilshisine jariialaýǵa berdi. Onda olar rezonansty qylmystyq iske qatysty sot otyrysy ádil ótetinine kúmándanatyndaryn jetkizgen.
"Men, Serikbai Nuraidyń aǵasy Sultan Serikbai sottyń ádil, ári onlain ótýine ótinish qaldyrdyq. Sony biz talap etemiz. Árbir qazaqstandyq azamat sot protsessin onlain túrde kórse, bizdi qorǵaý úshin baryn salady dep oilaimyn", - dep málimdedi jábirlenýshi.
Murat Ábenov óz sózinde quqyq qorǵaý organdarynyń áreketine ashyq narazylyǵyn bildirdi. Ol jalǵan videolardyń taralýy tergeýge keri áser etip jatqanyn aityp, Ishki ister ministrligi men Bas prokýratýraǵa birqatar saýal qoidy.
"Bul kisilerdiń eń qatty ýaiymdap turǵany - senbei tur. Men de ádil tergeý ótetinine senbei turmyn. Qansha kún boldy Prezident, Ishki Ister ministri tapsyrǵannan keiin politsiia qyzmetkerleri Nurai týraly qoldan jasalǵan videony taratyp, nasihattap jatyr. Sonda ministrdiń, Bas prokýratýranyń qolynan kelmegeni me?! Nege Prezident tapsyrǵannan keiin qyz týraly qoldan jasalǵan videolar buqaralyq aqparat quraldaryna tarap ketedi? Politsiiaǵa men de habarlastym. Osy ýaqytqa deiin ol videony, jalǵan aqparatty taratýǵa bailanysty eshkim eshqandai áreket qoldanyp jatqan joq. Ishki Ister ministrligi, sonda bar maqsattaryńyz óz qyzmetkerlerińizdi qorǵaý ma? Nege osy ýaqytqa deiin Bas prokýratýra arnaiy tergeý tobyn jasaqtap, tárkilemeidi buny?! Tergeý materialdaryn zańsyz taratyp jatyr jáne bul tergeýge teris áser etý", - dedi Murat Ábenov.
Jábirlenýshi tarap Prezident ákimshiligine jáne Bas prokýratýraǵa aryz-shaǵym túsirgenin jetkizip otyr.
Eske salaiyq, biyl 11 qańtar kúni keshki ýaqytta Nurai Serikbai úiinen un alý úshin syrtqa shyqqan sátte úiin torýyldap júrgen kúdikti oǵan shabýyl jasap, birneshe ret pyshaq suqqan. Aýyr jaraqat alǵan boijetken oqiǵa ornynda kóz jumdy. Qazir kúdikti qamaýǵa alynyp, is QR Qylmystyq kodeksiniń «Adam óltirý» baby boiynsha tergelip jatyr.
Kúdikti retinde Nurai Serikbaidyń tanysy Aimahan Sherhan tanylyp otyr.
Marqumnyń jaqyndary bul qylmystyń aldyn alýǵa bolar edi dep esepteidi. Olar Aimahan Sherhandy adam urlaý, júieli qýdalaý (stalking), qorqytý jáne adam óltirý baptary boiynsha eń qatań jazaǵa tartýdy talap etip otyr. Sondai-aq jábirlenýshiniń aryzdaryna tiisti deńgeide áreket etpegen quqyq qorǵaý organdary qyzmetkerleriniń de jaýapkershiligi qaralýy tiis ekenin aitady.
