Aqtóbege «Ne molchi» qoǵamdyq qory men «Uran» qoǵamdyq birlestiginiń ókilderi keldi. Olar mektepte brifing ótkizip, zorlyq kórgen oqýshy qyzdy ońaltý jaiyn talqylady, dep habarlaidy QazAqparat.
Óz úiinde zorlyq kórip, aýrýhanaǵa túsken oqýshy qyzǵa kómektesý qajet. Búgin №17 Aqtóbe qalalyq orta mektebinde jýrnalisterdi jinaǵan qoǵam belsendileri japa shekken oqýshyny qorǵaý, onyń ómirge qaita beiimdelýi týraly aitty. Otbasymen, oqýshymen tildesý úshin Aqtóbege Almatydan psiholog arnaiy kelgen.
«Oqýshy qyzdyń mekenjaiy týraly aqparat áleýmettik jelige tarap ketti. Sol kópqabatty úidiń sýreti shyqqannan keiin de 9 jastaǵy qyzdyń kim ekenin bári bilip otyrady. Jábirlenýshi úshin úlken soqqy boldy. Bul kompaniianyń jarnamasy nemese shoý biznes ókilderiniń jumysy ómiri emes. Mundai oqiǵada qyzdyń, adamnyń taǵdyry basty rólde bolýy shart. Aqtóbede zorlyq kórgen qyz qazir aýrýhanada. Anasyn nemese ákesin «balany baqylaýsyz qaldyrdy» dep aiyptamas úshin biz kómek kórsetemiz. Ákimdik te bárin baqylaýda ustaidy. Ýaqytsha baspana berip, qoldaý bildirýge ýáde etti», - dedi «Ne molchi» qoǵamdyq qorynyń jetekshisi Dina Smailova.
Qazir Aqtóbe oblysy boiynsha 5 adam Dina Smailovaǵa aryz túsirgen. Onyń ekeýi bala, úsheýi áielge qatysty zorlyq-zombylyq.
«Biz zorlyq-zombylyq kórgen oqýshynyń mektebinde bolyp, ata-analarmen kezdesý ótkizdik. Bizdiń túsingenimiz – zorlyqtyń aldyn alý kerek. Balalarǵa, ata-analarǵa saqtyq sharasyn jan-jaqty aitamyz, qorǵaný joldaryn úiretemiz», - dedi ¤ ¤«Uran» respýblikalyq qoǵamdyq birlestiginiń tóraǵasy Faizolla Qamenov.
Eske salsaq, Aqtóbede 12 jeltoqsan kúni mektep oqýshysyn zorlap ketti. 21 jastaǵy kúdikti bir aptada ustaldy.
