Qoǵam belsendileri Áliia Sadyrbaeva men Samat Nurtaza Nur Otan partiiasynyń praimerizine qatysatynyn málimdedi.
Qoǵam qairatkeri, kásipker, kópbalaly ana Áliia Sadyrbaeva úsh jyl buryn Senatqa kandidat retinde qatysýǵa tyrysqanyn aitady. Onyń oiynsha, bilikke aralasyp, júieni ishten ózgertý qajet. Iaǵni, eldi jegidei jegen sybailas jemqorlyqqa qarsy kúreste «antidene» bolý kerek. «Eger biz sekildi belsendi, adal jáne ádil, sybailas jemqorlyqtan ada adamdardyń kópshiligi bilikke kelse, onda biz bárin ózgertemiz!», - deidi ol.
Qoǵam belsendisi búgingi ýaqyt túbegeili ózgeristerdi qajet etetinin aitady. Sondyqtan oǵan beibit, evoliýtsiialyq jolmen barý qajet dep esepteidi.
«Bizdiń aldymyzda jańa oqiǵalarǵa toly kúz kútip tur. Bireý turaqsyzdyqty kútedi, bireý qorqynyshtan basqa bir jaqqa ketýdi qalaidy. Men eshteńe kútpeýdi jáne eshqaida ketpeýdi usynamyn. Elde qalyp, ony ózgertýge tyrysýdy usynamyn», - deidi Á.Sadyrbaeva.
Qoǵam belsendisi Nur Otan-ǵa kelip, partiiaǵa túbegeili ózgerister daiyndap jatqan kóptegen laiyqty adamdardyń bar ekenin aitady.
«Nur Otan partiiasyn jaqtaýshylar ligasy» siiaqty jańa ideialar men jobalar usynylyp jatyr. Liga qazirgi saiasi shyndyqta jumystyń jańa qaǵidattaryn engizýge negiz bolady. Men onda el taǵdyryna beijai qaramaityn jandardyń jinalyp jatqanyn kórip otyrmyn. Sondai-aq elde kataklizmder, shekten shyǵýlar men kúizelisterdi qalamaityn kópbalaly ana retinde olardyń júieni beibit, evoliýtsiialyq jolmen ózgertý ideiasyn tolyq qoldaimyn. Biz tek osylai ǵana elimizdi saqtai alamyz!», - deidi ol.
Áliia Sadyrbaeva sóz sońynda kópshilikti Májilis pen máslihat depýtattaryn sailaý aldynda jariialanǵan Nur Otan partiiasynyń praimerizine qatysýǵa shaqyrdy.
Eýraziialyq integratsiia institýtynyń sarapshysy, tanymal bloger Samat Nurtaza da Nur Otan partiiasynyń aldaǵy ótetin praimerizine qatysýǵa niet bildirdi.
«Biraz ómir kórdik. Jaqsy-jamandy ajyrata alatyn jasqa da kelgen siiaqtymyz. 30 jyl egemendigimizde «talai jetistikke jettik» dep maqtanamyz, jetkenimiz de ras shyǵar. Birak sol 30 jyldyń ishinde halyqtyń oiy men demokratiiasy as úidegi sybyr sózden aspai qaldy. Sol halyqtyń ishinde jatqan haq ideialar men adal oilardyń syrtqa shyǵatyn kezi kelgen siiaqty», - deidi ol óziniń áleýmettik jelidegi jazbasynda.
Onyń aitýynsha, elde ózgerister bolýyn qalaityn jandar qatary az emes. Sondyqtan da ol ózgeristerdi Májilis pen Máslihattan bastaý kerek dep esepteidi.
«Shyny kerek Májilis pen Maslihatqa halyqtyń qamyn jeitin, halyqtyń sózin sóileitin, «halqym maǵan senip, qarap otyr ǵoi» dep kúnde ýaiymdaityn jastar keletin ýaqyt boldy. Saiasi ózgeristerdi ózimiz jasamasaq, bizge bireý aspannan kelip jasap bermeidi», - dep atap ótti sarapshy.
Samat Nurtaza osy sebepti de aldaǵy ótetin praimerizge qatysýǵa bel bailaǵanyn aitady.
.jpeg)