Kóbeituzǵa kóligimen kirip ketken júrgizýshi qazaqstandyqtardan keshirim surady. Onyń keshirim suraǵan videosy Ishki ister ministrliginiń saitynda jariialandy, dep habarlaidy QazAqparat.
IIM-nen habarlanǵandai, tártip buzýshy Nur-Sultannan Ekibastuzǵa issaparmen bara jatqan. Jolshybai elge tanymal bolyp ketken kóldi kórmek bolǵan.
«Álbette men durys áreket jasamadym. Kólge kirip ketkenim úshin keshirim suraimyn. Jaspyz ǵoi, jaiaý da kirip, kóldi keship qaitýǵa bolar edi. Biraq olai bolmady. Áleýmettik jelide ártúrli pikir aitylýda. Keshirim suraimyn. Ózim 40 jastamyn. Ózim de osyndai qadamǵa qalai barǵanymdy baiqamai qaldym», - deidi ol.
Eske sala ketsek taiaýda qyzǵylt tústi Kóbeituz kóline kóligimen kirip ketken azamattyń fotosýreti áleýmettik jelide qyzý talqylanǵan bolatyn. Aqmola oblysynyń politsiia qyzmetkerleri ol júrgizýshini ustap, ákimshilik kodekstiń eki baby boiynsha jaýapqa tartty. Atap aitqanda tártip buzýshy ákimshilik kodekstiń 364-baby (Ortaq sý paidalaný qaǵidalaryn buzý) boiynsha eskertý jariialanyp, 434-babynyń II tarmaǵy boiynsha (Ortaq paidalanylatyn oryndardy lastaý) 5 AEK (13 890 teńge) aiyppul salyndy.
