"Asyl arna" telearnasynyń direktory Muhamedjan Tazabektiń qoǵamdyq lektsiialarynyń montajdalǵan nusqasy áleýmettik jelige tarap, el-jurt álgi videoda aitylǵan áńgimeni ájeptáýir talqy jasady. Ásirese, arab saqshylaryna musylmandardyń qasietti orny sanalatyn Qaǵbada, jurttyń jolynda turyp namaz oqyǵan adamǵa birneshe márte eskertý jasap namazyn bólýge, oǵan kónbese quiryǵynan teýip toqtatýǵa ruqsat etilgen degen aýandaǵy sózder el arasynda ártúrli pikir týǵyzdy.
Qudaiǵa qulshylyq jasap turǵan adamnyń namazyn buzýǵa bola ma? Qasietti Qaǵbanyń ózinde namazhandy tebýge ruqsat berilse, onda ózge meshitterde qalai? Bul qanshalyqty shariǵat sheńberine syiymdy áńgime?
Biz Qazaqstan Musylmandary Dini basqarmasyna habarlasyp, pikir suradyq. Saýalymyzǵa QMDB Pátýa jáne shariǵat bólimi meńgerýshisiniń orynbasary Hasan Amanqulov jaýap berdi.
Hasan Amanqulov, QMDB ókili:
- Shariǵat boiynsha bastaǵan namazdy sońyna deiin oqyp bitirý mindet. Al sebepsiz óziniń namazyn buzý nemese bireýdiń oqyp turǵan namazyna kedergi jasaý haram, iaǵni kúná bolyp sanalady. Musylman adam mundai áreketke barmaýy tiis.
Islamnyń alǵashqy jyldarynda musylmandar dinin jasyryn ustaýǵa májbúr bolǵan. Musylman bolýǵa, namaz oqýǵa din dushpandary (kápirler) kóp kedergi jasaǵan. Tipti, Qaǵbaǵa baratyn jolǵa tiken tastap, Paiǵambarymyzdy (oǵan Allanyń salaýaty men sálemi bolsyn) namaz oqýdan tosatyn, sájdede jatqanda ústinen túieniń qaryn ishekterin tastap qorlaityn.
Qazirgi tańda jylda milliondaǵan adam qajylyqqa barady. Maǵan da biyl Alla Taǵala qasietti Mekkege baryp, qajylyq ǵibadatyn atqaryp kelýdi násip etti. Sol jerde tártipke qaraityn arnaiy saqshylar (politsiia) qyzmet etedi eken. Qaǵbanyń ainalasynda, ásirese, dál qara tastyń janynda keptelistiń bolýy, adamdar júretin jolda keibireýler namaz oqyp turyp alýy, odan basqa birin-biri túrtip, alysyp jatýy kóp qiyndyq týǵyzady eken.
Solai bolsa da, saqshylardyń qajylarǵa qabaq shytqanyn baiqamadym. Qaita qulasa, jerden turǵyzyp, qajylardy salqyndatý úshin ústilerinen sý seýip, jol suraǵanǵa jyly shyraimen jolyn aityp, qansha tártip buzsa da, oǵan sabyrlyqpen túsindirip, eskertip jatqandyǵyn kórdim. Tipti, mynandai bir jaǵdai boldy. Qaǵbany táýap etip bolǵan soń shetke shyǵyp eki rakaǵat namaz oqý bar. Sonda qajylardyń biri saqshylardyń eskertýine qaramai, tártipke baǵynbai, týra jolǵa turyp alyp namazyn bastap ketti. Sonda da, saqshy sol adamdy namazy bitkenge deiin kútip turdy. Namazyn aiaqtaǵan soń ádeppen bylai jasaýǵa bolmaitynyn aitty.
Alla Taǵala barshamyzǵa bir-birimizge meiirimdi bolýdy jazsyn!
Abai.kz
