Qazaqstan musylmandary dini basqarmasy "Charlie Hebdo" jýrnalynda jariialanǵan Muhammed paiǵambardyń karikatýrasyna qatysty málimdeme jasady, dep habarlaidy "Ult aqparat".
"Sońǵy kezderi álemde sóz erkindigi men demokratiia astarynda jekelegen etnostardy nemese konfessiialardy balaǵattaý, kemsitý, arandatý jii kórinis taba bastady. Árine, mundai jaǵdai kópshilik elderdi, halyqtardy jáne túrli din ókilderin qatty alańdatady. Bul bir jaqtan radikaldyq kózqaras pen lańkestikti, ekinshi jaqtan konfessiiaaralyq óshpendilik pen arazdyqty týdyrýda", - delingen málimdemede.
Osy oraida múftiiat keibir bilik ókilderiniń aitqan qisynsyz pikiri álemdegi barlyq musylmannyń ashý-yzasyna sebep bolǵanyn da erekshe atap ótti. Degenmen, shynaiy musylman óz paiǵambaryna degen súiispenshiligin, onyń naǵyz úmbeti ekenin senimi men izgi isteri, ádeptiligi men kórkem minezi arqyly kórsetedi.
"Sonymen qatar, musylmandar óz dini men paiǵambaryn qorlaýǵa jol bermeidi. Sebebi, paiǵambarǵa iman keltirýmen qatar ony qorǵaý da musylmannyń mindeti bolyp tabylady. Osy jaǵdaiǵa bailanysty, Qazaqstan musylmandary dini basqarmasy óziniń kelispeýshiligin bildiredi jáne musylmandardy túrli arandatýshylyq áreketterge berilmei, barlyq amaldyń shariǵat ári zań sheńberinde sheshilýi tiis ekendigin jetkizedi", - dep atap ótti QMDB.
Múftiiat elimizdegi din ókilderi men qarapaiym halyqtyń keibir saiasi kúshter men túrli radikaldyq toptardyń qurbany bolyp ketpeýin qalaidy.
"Árbir musylman kez kelgen din jáne dini qatynastarǵa qatysty sóz bolǵanda máseleniń náziktigin eskerip, ony túsindirý men taratýda óziniń róli men qoǵam aldyndaǵy azamattyq jaýapkershiligin tereń sezinýi tiis", - deidi mamandar.
