Sońǵy kezderi mekteptegi dini ahýal kúrdelenip, din ustanǵan oqýshylardyń kiim úlgisi jii talqyǵa túsetin boldy. Qazir ekiniń biri bilim ordalaryndaǵy oramal taqqan qyzdardyń máselesin sóz etip, birinshi tarap munyń durystyǵyn, ekinshi tarap bolsa burystyǵyn dáleldep, qyryq-pyshaq bolyp jatady. Endi osy kúrdeli máselege Qazaqstan musylmandary dini basqarmasy resmi túrde málimdeme jasap otyr.
"Qazaqstan musylmandary dini basqarmasy oqýshy qyzdardyń mektepke oramal taǵyp barýǵa bailanysty ata-analar men oqý oryndary basshylary arasynda týyndaǵan ártúrli pikirler men saýaldarǵa qatysty óziniń málimdemesin joldaidy.
Ibaly, inabatty, bilimdi ul men qyz ósirip, otanshyl, patriot jastardy tárbieleý árbir ata-ana men pedagogtyń basty maqsaty, uly missiiasy ekeni belgili.
Qazaqstandaǵy bilim berý júiesi tek qana oqytýdy ǵana emes, sondai-aq tulǵanyń barlyq suranystaryn tolyq júzege asyrý úshin jaǵdailardy jasaýǵa, olardy ónerge, sportqa, ziiatkerlik damýǵa tartýǵa baǵyttalǵanyn oqýshylardyń ata-analary sezinýleri kerek.
Islam dini kúlli adamzat balasyn bilim úirenýge úndeidi.
Birinshiden, er kisi men áielge bilim alý paryz (mindet). Alla elshisi (oǵan Allanyń salaýaty men sálemi bolsyn) bir hadiste: «Árbir musylmanǵa bilim alý paryz» degen. Al balaǵa zaiyrly bilimdi úiretý árbir adamnyń azamattyq ári musylmandyq boryshy. Zaiyrly memleketimiz ul-qyzdarymyzdyń orta bilim alýyn mindetteidi ári osy baǵytta barlyq múmkindikter men jaǵdailardy qamtamasyz etedi. Ata-analarǵa qyz balanyń mindetti zaiyrly bilim alýyna kóbirek kóńil bólýge keńes beremiz. Sapaly bilim bala bolashaǵynyń baiandy bolýyna úlken septigin tigizetinin umytpaýymyz tiis.
Ekinshiden, Quran jáne Muhammed paiǵambar (oǵan Allanyń salaýaty men sálemi bolsyn) hadisi men musylman ǵulamalarynyń biregei pikiri boiynsha, musylman qyzǵa oramal taǵý paryz (mindet). Qasietti Quranda Alla Taǵala: «Ýa, Paiǵambar! Jubailaryńa, qyzdaryńa jáne iman keltirgenderdiń áielderine ait: ústerine jamylǵylaryn túsirsin...» («Ahzap» súresi, 59-aiat) dep buiyrǵan. Alaida Qurannyń aiattarynda kiimniń túsi men úlgisi naqty kórsetilmegen. Ár ult Allanyń ámirin óz ustanymdary, ádet-ǵuryptary men tarihi tanym-túsinikteri boiynsha oryndaidy.
Osyǵan orai, elimizdiń qyzdary men áielderine qara tústi kiimdi qoldanbai, qazaq halqynyń salt-dástúrleri men ǵuryptaryn saqtai otyryp, shariǵattyń sheńberinen shyqpai baisaldylyqpen kiinýge keńes beremiz.
Al baliǵat jasyna tolmaǵan qyzdyń oramal taǵýyn shariǵatymyz talap etpeidi. Sondyqtan ata-ana kishkentai búldirshindi áli mindet bolmaǵan oramal úshin paryz bolǵan bilim alýdan tyimaýy tiis.
Naqty aitqanda shariǵat talaptaryna sáikes Islam dini mektep tabaldyryǵyn jańa attaǵan qyzǵa oramal taǵýdy mindettemeidi.
Úshinshiden, Ata Zańymyz qoǵamdyq qatynastardy retteidi jáne azamattardyń bostandyǵy men dini senimderine erkindik beredi. Musylmandar da Allanyń ámiri boiynsha zańdy saqtaidy jáne oǵan qurmetpen qaraidy. Óitkeni, zaiyrly qoǵamdaǵy zańdar men erejeler barsha adamnyń teń quqyǵyn basty orynǵa qoiatyn kepildik qujat jáne azamattardyń ómir súrý tártibin kórsetetin baǵdar.
Qazaqstan musylmandary dini basqarmasy musylman jamaǵatyn, ata-analardy birlikke úndeidi jáne mektep basshylarymen ortaq mámilege kelýge shaqyrady.
Dini basqarma Alla Taǵaladan elimizdi túrli búlikten saqtap, halqymyzdyń birligi men yntymaǵyn nyǵaityp, berekesin arttyrýdy tileidi".
Abai.kz
