Búgin, Qurban aittyń alǵashqy kúni Qazaqstan musylmandary dini basqarmasy (QMDB) óziniń Youtube jáne Instagram paraqshalary arqyly «Qurban ait – ulyq mereke» atty nasihattyq baǵyttaǵy onlain shara uiymdastyrdy.
Bul týraly QazAqparat basqarmanyń resmi saityna silteme jasap habarlaidy.
Nur-Sultan ýaqytymen 08:00 men 09:00 aralyǵynda ótken merekelik baǵdarlama QMDB Tóraǵasy, Bas múfti Naýryzbai qajy Taǵanulynyń Qurban ait merekesine arnalǵan aq tilegimen ashyldy.
Sondai-aq qashyqtan (onlain) qurban shalýdyń ereksheligi (QMDB Tóraǵasynyń orynbasary, naib múfti Ershat Ońǵarov), qurban shalýdyń tarihy (QMDB Dini bilim jáne kadr daiarlaý bóliminiń meńgerýshisi Smaiyl Seitbekov), qurban shalýdyń sharttary (QMDB Shariǵat jáne pátýa bólimi meńgerýshisiniń orynbasary Hasan Amanqulov) jaily ádemi áńgime órbidi.
Baǵdarlama barysynda Ákim Tarazi, Nurtóre Júsip, Darhan Qydyráli, Dihan Qamzabekuly sekildi el aǵalary Qazaqstan musylmandaryn Qurban ait merekesimen quttyqtap, jyly lebizin bildirdi.
