Qytai tóraǵasy Si Tszinpin Qazaqstanǵa resmi saparmen kelýi múmkin. Bul týraly QHR-dyń Qazaqstan Respýblikasyndaǵy tótenshe jáne ókiletti elshisi Chjan Siao aitty, dep habarlaidy Baq.kz agenttigi.
Elshi «Qytai tóraǵasy Si Tszinpinniń Qazaqstanǵa resmi saparmen kelýi jáne QR Prezidenti Nursultan Nazarbaevtyń Qytaiǵa barýy múmkin be» degen suraqqa jaýap berdi.
«Qazir bul suraqtar eki eldiń Syrtqy ister ministrlikteriniń kún tártibinde talqylanyp jatyr. Kelýi múmkin ekenin joqqa shyǵarmaimyn», - dedi diplomat.
Aitýynsha, Astana men Beijińde eki eldiń mádeni ortalyqtaryn ashý týraly usynys Qazaqstannyń Syrtqy ister ministrligine joldanǵan.
«Biyl ekijaqty qarym-qatynastaǵy saiasatymyzdy osyǵan deiingi qalyptasqan dostyǵymyzdy nyǵaitýǵa baǵyttaimyz. Bul – bizdiń kúndelikti jumysymyz. Búginde qaryshtap damyp kele jatqan ekonomikalyq bailanysymyzdy, mádeni-gýmanitarlyq salamyzdy ári qarai jetildiremiz. Taǵy qazirgi maqsattarymnyń biri – Astanada qytai mádeni ortalyǵyn jáne Pekinde qazaq mádeni ortalyǵyn ashý. Mádeni ortalyqty tezdetip ashý – men úshin kún tártibindegi ózekti máselelerdiń biri. Qazaqstannyń Syrtqy ister ministrligindegi áriptesterimizge usynysymyzdy jetkizdik. Qazir vedomstvo usynysty qarastyryp jatyr», - dedi Chjan Siao.
Eske salaiyq, osyǵan deiin Qytai Halyq Respýblikasynyń Qazaqstan Respýblikasyndaǵy tótenshe jáne ókiletti elshisi Chjan Siao «Qytaidyń Qazaqstandy jaýlaityn geosaiasi jospary joq» degen edi.
Biyl Qytai jańa jyly 2 aqpanda bastalady. Osy airyqsha kúnge orai Qytai Halyq Respýblikasynyń elshiligi men Qazaqstannyń Ulttyq mýzeii birlese «Kóktem merekesi» fotokórmesin uiymdastyrdy.
