Búgin elordalyq «Barys» qurlyqtyq hokkei ligasyndaǵy kezekti kezdesýinde Finliandiianyń «Iokerit» komandasyn qabyldady, dep habarlaidy "Ult aqparat".
Eki komanda týrnir kestesinde qatarlas keledi. Atap aitqanda, 32 oiynnan keiin «Barys» 42 upaimen onynshy, «Iokerit» 39 upaimen 13 orynda tur. Sondyqtan da búgingi oiyn tartysty órbidi deýge negiz bar.
«Barys» hokkeishileri alǵashqy minýttan tizgindi qolǵa alýǵa tyrysty. Birneshe qaýipti sátterdi uiymdastyrdy. Degenmen ony golǵa ainaldyrýǵa kelgende sáttilik jetispei jatty. Esesine oiynnyń ekinshi kezeńinde fin hokkeishileri elordalyq klýb qaqpasyna eki shaiba soǵyp ketti. Aldymen 25-minýtta Ion Norman esep ashsa, 37-minýtta Braian O'Nill esepti ulǵaita tústi. Al 44-minýtta elordalyq hokkeishi Roman Starchenko esep aiyrmasyn qysqartty. Degenmen odan keiin 52 -minýtta «Iokerit» sapynan Marko Anttila mergendigimen kózge tússe, 58-minýtta «Barys» hokkeishisi Kiortis Volk qarsylastar qaqpashysyn qapy qaldyrǵan edi. Dese de 59-minýtta fin hokkeishisi Marko Anttila qorytyndy esepti belgiledi. Nátijesinde «Iokerit» 4:2 esebimen jeńiske jetti.
Aita keterligi, eki komanda búginge deiin toǵyz márte sheberlik baiqasqan. Nátijesinde 6 kezdesýde elordalyq klýb basym tússe, úsheýinde fin komandasy jeńiske jetti.
Budan buryn «Barys» Belarýstiń «Dinamo» (Minsk) komandasyn iri eseppen jeńgen bolatyn.
Endi «Barys» qatarynan bes oiyndy syrtta ótkizedi. Aldymen 7 jeltoqsanda Reseidiń «Sochi», 9 jeltoqsanda «Avangard» (Omby), odan keiin 18 jeltoqsanda «Torpedo» (Nijnii Novgorod), 20 jeltoqsanda «Vitiaz» (Podolsk), 22 jeloqsanda «Spartak» (Máskeý) komandalarymen kezdesedi.
