بٷگٸن ەلوردالىق «بارىس» قۇرلىقتىق حوككەي ليگاسىنداعى كەزەكتٸ كەزدەسۋٸندە فينلياندييانىڭ «يوكەريت» كومانداسىن قابىلدادى, دەپ حابارلايدى "ۇلت اقپارات".
ەكٸ كوماندا تۋرنير كەستەسٸندە قاتارلاس كەلەدٸ. اتاپ ايتقاندا, 32 ويىننان كەيٸن «بارىس» 42 ۇپايمەن ونىنشى, «يوكەريت» 39 ۇپايمەن 13 ورىندا تۇر. سوندىقتان دا بٷگٸنگٸ ويىن تارتىستى ٶربٸدٸ دەۋگە نەگٸز بار.
«بارىس» حوككەيشٸلەرٸ العاشقى مينۋتتان تٸزگٸندٸ قولعا الۋعا تىرىستى. بٸرنەشە قاۋٸپتٸ سەتتەردٸ ۇيىمداستىردى. دەگەنمەن ونى گولعا اينالدىرۋعا كەلگەندە سەتتٸلٸك جەتٸسپەي جاتتى. ەسەسٸنە ويىننىڭ ەكٸنشٸ كەزەڭٸندە فين حوككەيشٸلەرٸ ەلوردالىق كلۋب قاقپاسىنا ەكٸ شايبا سوعىپ كەتتٸ. الدىمەن 25-مينۋتتا يون نورمان ەسەپ اشسا, 37-مينۋتتا برايان و'نيلل ەسەپتٸ ۇلعايتا تٷستٸ. ال 44-مينۋتتا ەلوردالىق حوككەيشٸ رومان ستارچەنكو ەسەپ ايىرماسىن قىسقارتتى. دەگەنمەن ودان كەيٸن 52 -مينۋتتا «يوكەريت» ساپىنان ماركو انتتيلا مەرگەندٸگٸمەن كٶزگە تٷسسە, 58-مينۋتتا «بارىس» حوككەيشٸسٸ كيورتيس ۆولك قارسىلاستار قاقپاشىسىن قاپى قالدىرعان ەدٸ. دەسە دە 59-مينۋتتا فين حوككەيشٸسٸ ماركو انتتيلا قورىتىندى ەسەپتٸ بەلگٸلەدٸ. نەتيجەسٸندە «يوكەريت» 4:2 ەسەبٸمەن جەڭٸسكە جەتتٸ.
ايتا كەتەرلٸگٸ, ەكٸ كوماندا بٷگٸنگە دەيٸن توعىز مەرتە شەبەرلٸك بايقاسقان. نەتيجەسٸندە 6 كەزدەسۋدە ەلوردالىق كلۋب باسىم تٷسسە, ٷشەۋٸندە فين كومانداسى جەڭٸسكە جەتتٸ.
بۇدان بۇرىن «بارىس» بەلارۋستٸڭ «دينامو» (مينسك) كومانداسىن ٸرٸ ەسەپپەن جەڭگەن بولاتىن.
ەندٸ «بارىس» قاتارىنان بەس ويىندى سىرتتا ٶتكٸزەدٸ. الدىمەن 7 جەلتوقساندا رەسەيدٸڭ «سوچي», 9 جەلتوقساندا «اۆانگارد» (ومبى), ودان كەيٸن 18 جەلتوقساندا «تورپەدو» (نيجنيي نوۆگورود), 20 جەلتوقساندا «ۆيتياز» (پودولسك), 22 جەلوقساندا «سپارتاك» (مەسكەۋ) كوماندالارىمەن كەزدەسەدٸ.
